Naghilak nga Bituon

Gula 71

Nahilom si Jackie. Gihinuktokan niya ang gisulti sa iyang manager.

“Ugma dayon magpatawag kita’g presscon,” matud sa iyang manager. “Ug kinahanglang deny-to-death ka sa tanang mga pangangkon ni Flip Garcia.”

Miatubang gayod si Jackie sa press people nianang pagkaugma. Ang presscon nga gipatawag sa iyang manager gitambongan sa iladong mga sakop sa entertainment media nga gipangulohan nilang Cristy Fermin, Lolit Solis, Aster Amoyo, Benjie Felipe, Ed de Leon, Regee Bonoan ug daghan pang uban.

Atubangan sa taga media gi-deny gayod ni Jackie ang tanang mga pangangkon ni Flip Garcia mahitungod sa ilang relasyon. Gi-briefing na siyang daan ni Joy Lorenzo kun unsay iyang isulti ug ipanubag sa mga pangutana sa press people.

Migawas gilayon ang statement of denial ni Jackie sa mga pamantalaan ug gisibya usab sa mga estasyon sa radyo ug telebisyon sa kaulohan.

Si Jackie ug ang iyang manager kanunay nga nagsunod sa mga balita sa showbiz sukad sa paggawas sa pamahayag niya sa mga pamantalaan. Ilang giatangan kun unsay reaksiyon ni Flip Garcia sa pag-deny ni Jackie nga may relasyon sila.

Apan nasuta ni Jackie nga milugak ang bakos ni Flip. Mubo ra kaayo ang pamahayag niini nga napatik sa mga pamantalaan. -- Sumpayan pa