Gula 6
Nanglabay ang daghang mga adlaw sa pag-estar ni Rosalinda sa balay nila ni Reynan. Nakadayeg kaayo ang mga ginikanan sa ulitawo kang Rosalinda kay gawas nga buotan molihok gayud kini sa mga buhaton sa balay.
Usa ka gabii, dugay’ng nahiuli sa balay si Reynan. Dugay usab nga natulog si Rosalinda kay siya man ang moabli sa gate kun moabut na ang sakyanan sa ulitawo.
“Katulog na lang Day, Rosalinda, kami na lang ang magpaabut ni Reynan kay mosayo ka pa ra ba pagmata,” matud sa inahan ni Reynan ngadto sa dalaga. “Huwaton lang nako siya Nang.” Wala mahimutang si Rosalinda nga dugay’ng nauli si Reynan. Dili kini sagad nga himuon ni Reynan nga dugay’ng mopauli. Dili usab makontak ang iyang cellphone nga gisuwayan og kontak sa iyang inahan.
Hapit na ala-una sa kaadlawon nga nakadungog si Rosalinda nga may nagserbato sa gate. Sa iyang paglili si Reynan na gayud ang nahiabot. Napasiga ang mga mata ni Rosalinda kay samtang naka-drive man tuod si Reynan, apan klaro kaayo kini nga hubog.
Pagkanaug niini sa sakyanan nahasukamod ang ulitawo. Gidali pag-alalay ni Rosalinda si Reynan aron kini makabarog pagbalik. Giagak ni Rosalinda si Reynan paingon sa sulod sa balay human niya masirad-i ang gate.
Iya kining gipalingkud sa sopa, dayon nagkuha siya’g init tubig ug gibasa niya kini ngadto sa face towel. Gitrapohan niya ang nawong sa ulitawo, dayon ngadto sa bukton.
“Naunsa ka man Reynan nga nahubog ka man?” daw mabalak-on kaayo ang tingog ni Rosalinda nga nangutana. “Diin ka man diay gikan?” dugang pangutana sa dalaga.
Gipasabot si Rosalinda ni Reynan nga gidala siya sa iyang mga higala nga mitambong sa despideda party alang kang Sir Wendel, ang tag-iya sa Sanciangko’s Wildflower.
Moadto na sa laing nasud si Sir Wendel ug mao nga tak-opan na niya ang Sanciangko’s Wildflower. Ang mga suki niini gihatagan og libre sa tanan nila nga makaon ug mainom, samtang gilingaw sila sa mga dancers.
“Salamat kaayo sa imong pag-atiman kanako Rose,” matud ni Reynan. “Gibugtian ko lang ang imong pagtambal kanako dihang gidagmalan ko sa akong amahan Reynan.”
Nagtinutokay silang duha ug daw nagsultihanay ang ilang mga mata. “I love you Rose,” matud ni Reynan dungan sa paggunit sa kamot sa dalaga. (Sumpayan)