Gula 27
“Asa pa? Mangaligo gud sa dagat. Adto mi sa Ocean Bay Resort Pob., Dalaguete mangaligo.”
“Kamo lang, Ate. Dinhi lang ko sa ba’y.”
“Ikaw rang usa dinhi. Boring kaayo.”
Wala man gud sa balay adlaw’ng tanan ang ilang mga ginikanan. Atua sila kanunay sa gamay nilang puwesto sa prutasan sa Carbon.
“Kuyog lang namo,” ni Alexa pa nga misubli pag-awhag kaniya. “Dili lagi ka ma-out of place. Nia bitaw ko.”
Wala motubay si Colleen sa gisulti sa iyang maguwang. Misantop sa iyang hunahuna nga segurado gyud hinuon nga ma-out of place siya kun mokuyog siya sa pangaligo’g dagat nila ni Alexa. Nakaseguro siya nga ang atensiyon unya sa iyang maguwang adto ra kang Cody.
Pero mingaw usab sa balay kun siya na lang usa. Nakaseguro siyang aboton gayod siya og kalaay. Mao nga naglibog si Colleen kun unsay angay niyang buhaton. Kakuyogon dili siya nila ni Alexa.
Miagpas si Yana kang Alexa sa lawak ni Colleen.
“Puydeng mosulod,” nagtingsi si Yana nga nagbarog sa may pultahan.
“Dali,” si Alexa ang miagni niini.
Misulod si Yana.
“Naluto na ang tanan,” ni Yana pa. “Andam na ang tanang mga dad-onon.” -- Sumpayan pa