Ang bawos ni Ricky

Labihan ang kalagot ni Ricky sa dihang nabihag ang iyang hiniktang ugis sa manok sa ilang silingan nga si Berto. "Porbidang malasa gyud nako! Di man unta makabintaha sa labok sa akong hiniktan ang manok ni Berto pero napildi man?!" matud ni Ricky ngadto sa iyang asawa nga nagluto sa ilang panihapon usa ka Domingo niana.

"Kalma lang Rick kay mao gyud nang sugal, usahay makadaug unya, mapildi sad. Mora man og bag-o pa kang sugarol nga maglagot mapildi." Tambag sa asawa ni Ricky nga si Esing.

"Pero ang ako man gud nahibudngan kay nakita na nako ang labok ug inawayan sa iyang manok sa miaging adlaw didto sa tugkaran nilang Dadicol. Kompyansa kaayo ko’ng di makapildi sa akong manok ang iyang hiniktan maong wa koy duhaduha nga giparang ang among duha ka manok didto sa tigbakayan."

"Mao nay paga-ingnon, Rick, nga better luck next time na lang," tubag sa masinabuton niyang kapikas.

Sa pagkasunod adlaw, may nagbalita ni Ricky nga mao diay'ng napildi ang iyang manok kay may tangil gigamit si Berto.

"Bantog rang nangharos ang manok ni Berto sa tigbakayan niadtong adlawa kay nigamit diay siya’g tangil. Makabawos ra ko nimong Bertoha ka!" ni Ricky pa ngadto sa iyang asawa nga maoy gipahungawan sa iyang kapungot.

Usa ka adlaw niana, nakadakup og langgam Tikarol si Ricky samtang nagtugway sa iyang tulo ka kanding duol sa punoan sa kahoy.

"Kini ang akong gipangita aron makabawos ko ni Berto. Seguro ko’ng natug pa ron siyang mga orasa kay pwerte to huboga gabii nga nakig-inom sa tindahan sa tuba nilang Delia," ni Ricky sa iyang kaugalingon nga daling mipaingon sa ilang Berto.

Duol sa balay ni Berto nakita niya ang punoan sa saging ug kay wa pa man nagtikawtikaw sa palibot, dali niyang gitugsok ang sungo sa tikarol sa lawas sa saging gumikan kay medyo humok raman kini. Nagkapakapa intawon ang langgam ug daling mipahipi si Ricky sa punoan sa lubi.

Wa madugay nakita niyang nanaug si Berto sa iyang balay aron itugway ang iyang baka. Sa dihang nakita niya ang langgam nga nagkapakapa dali kini niyang gikuha ug naglingilingi kun wa bay laing tawo nga               nakakita.

"Swerte na sad ni nako ron. Tagsa rang langgam nga matusok sa punoan sa saging.Himuon ko kining tangil para sa akong panigbakay karong Domingo,"matud ni Berto sa iyang kaugalingon nga daling misud sa ilang balay.

Tuod man, nanari dayon siya nianang pagka Domingo ug nag-abot sila ni Ricky sa tigbakayan.

"Usab ta bay? Ako ning iparang sa imong manok ang akong banogon, sukna ni Ricky nga nagngisi ngadto kang Berto. "Doblehon nato ang atong pusta sa una natong tari niadtong nangaging mga adlaw."

"Sugot kaayo ko, Rick, bisan tudo ug lupig sa tapad ang akong manok sa imoha," tubag ni Berto nga kompyansa kaayong modaug na usab ang iyang manok.

Sa dihang ang ila nang duha ka mga manok ang nagsangka sa roydahan, wa magdugay ang manok ni Berto nga daling mikupokupo sa dihang naglabok ang duha ka hiniktan.

"He-he-he! Bawosbawos lang ang panahon, Bert. Wa ni giila ang akong manok bisan dunay tangil," nagngising sungog ni Ricky kang Berto nga daling mibiya sa tigbakayan.

"Buanga oy, mao tingaling nabihag ang akong manok kay nahibaw-an ni Ricky nga may tangil kong gigamit," nagkanayon si Berto nga huyhoy ang abagang mipauli sa ila. (Katapusan)