Naghilak nga Bituon - Gula 68

“Nganong imo man kadtong gibuhat, Flip?” Sukmat ni Jackie.“Dili ba nagsabot na man kita nga ililong nato sa publiko ang atong relasyon.”

“I’m sorry, Jackie,” ni Flip pa. “Pero dili ko gustong mag-compromise sa atong relasyon. Dili makiangayon alang kanako kun dili mo angkonon sa publiko nga ako ang matuod mong boyfriend ug dili si Jerome Celesta.”

“Ug dili ba usa man ka dakong compromise ang imong gihimo karon? You are exposing my career to risk! nagpa-interview ka sa taga media nga wala gani mokonsulta og mopahibalo nako. Wala lang nimo hunahunaa kun unsay mahimong linugdangan sa imong gibuhat sa akong career.”

Wala motingog si Flip. Miduko kini sa atubangan ni Jackie.

“Wala kay concern sa akong career, Flip,” ni Jackie pa.

“Wala ka lang makasabot sa akong tumong, Jackie,” nagkanayon si Flip.

“Tinuod nga wala ko ikaw hisabti tungod kay lisod ka kaayong sabton. You are a selfish and dominant person ug wala ka usab makasabot kanako. Ug kay dili man gayod kita magkasinabot, wala’y maayong padulngan ang atong relasyon.”

“U-unsay buot mong ipasabot nianang imong sinultihan?”

“I’m sorry, Flip. Ulahi ka nang miabot sa akong kinabuhi kay sa akong career. Artista na kong daan sa wala pa kita magkaila. Mao nga bisan gimahal ko pa ikaw, palabihon pa gihapon nako ang akong career. Nakahukom kong bugtuon ang atong relasyon.” -- Sumpayan pa