Mas gipili ang anak kay sa bana

Oy, Fred, pag-ilis na diha kay imo man kahang sugaton sa airport si Emma gikan sa Amerika, matud ni Karen nga iyang asawa. "Tuod no. Nakalimot man lang diay ko," tubag ni Fred nga midali pagsulod sa lawak aron mag-ilis.

"Pila na ba ka tuig si Emma sa Amerika, Fred?" Pangutana ni Karen sa pagawas sa iyang bana gikan nga nag-ilis.

"Napulo na ka tuig karon sukad nga naminyo siya og Amerikano. Sige, adto na ko," dayong gawas ni Fred ug misakay sa iyang kotse.

Didto sa airport, samtang nagpaabot si Fred sa pag-abot sa eroplano, namalik sa iyang panumdoman ang 20 anyos nga nangagi. Suod kaayong managhigala sila si Emma ug classmates sa high school hangtud sa kolehiyo.

"Fred, mangayo unta ko nimo sa imong tambag."

"Mahitungod sa unsa man Emma?"

"Ang akong uyab kaniadto, gustong makipagbalikan nako, ug mahal ko ra ba gyud ning tawhana, apan nia may akong bag-ong uyab."

"Kinsa may mas matimbang alang nimo nianang duha nimo ka uyab?"

"Si Alex, ang una kong uyab maoy akong tinuod nga gimahal apan may nahitabo na namo ni Mario, karong bag-o lang.

"Aw, sultihi si Alex sa tinuod ug kun mahal ka gayud niya, mangasawa siya nimo."

"O, sige, kana na lang ang akong buhaton."

Nakigbalik si Emma kang Alex apan wala niya kini sultihi nga may nahitabo na nila ni Mario. Usa lang ka bulan ang milabay, nagpakasal sila si Alex ug Emma. Sulod sa walo ka bulan sukad sa pagkasal sa duha, nanganak si Emma. Sanglit sa madugay ug sa madali, ma-bulgar man gayud nga dili ang iyang banang si Alex ang amahan sa iyang anak, iya nalang gayud nga gisultihan si Alex. Tungod sa dakong pagmahal ni Alex kang Emma, gisabot sa bana ang asawa apan sa usa ka kondisyon -- nga patyon nila ang usa ka bulan nga bata ug ipagawas nga aksidente ang nahitabo.

     Gibutang ni Alex si Emma didto sa banyo samtang himuon ni Alex ang pagpatay sa bata pinaagi sa pagtabon og unlan sa nawong sa bata hangtud kini mamatay. Apan segundo lang ang gidugayon ni Emma sa banyo ug migawas kini ug gikabig ang kamot sa bana aron takpan sa unlan ang nawong sa bata. Iya dayon kining gikugos ug midagan pauli sa iyang mga ginikanan.

Naghimo nalang siya og pasangil nga nag-away silang magtiayon ug dili na siya gustong mobalik niini. Bisan ang iyang mga ginikanan wala masayud sa hinungdan sa panag-buwag nilang magtiayon. Bayente anyos nakaron ang bata ug kauban ni Emma ug sa iyang banang Amerikano aron mobakasyon sa Cebu. (Kataposan)