Gula 24
Apan nakapasalimuang sa iyang hunahuna ang panag-uban nila ni Cody kaganinang adlawan. Ingon sa misamot hinuon ang iyang paghigugma sa maong lalaki. Misamot ang kagaan sa iyang kabubut-on ngadto niini. Ingon gani sa dili siya makatugot nga mawala si Cody kaniya. Gusto niyang panag-iyahon si Cody sa tanang higayon.
Apan dili mahimong paundayonan niya kining pagbatia. Si Cody gipanag-iya na sa iyang ate Alexa. Dili siya gustong makahatag og kasamok sa ilang relasyon tungod kay gimahal niya ang iyang maguwang. Dili siya makahimo sa pag-ilog sa kalipay niini.
Nakaamgo si Colleen nga dili siya angay magpaulipon sa gibati niya ngadto kang Cody. Kinahanglang pakigbatokan niya ang maong pagbati. Nakahukom siyang likayan si Cody aron dili na mosamot ang gibati niyang paghigugma ngadto niini.
Adlaw’ng Domingo. Sila si Cody ug Alexa nagkasabot nga mangaligo sa dagat uban sa ilang mga higala. Alas otso sa buntag nahiabot si Cody sa balay nilang Colleen. Pipila ka gutlo ang nakalabay, nahiabot usab ang duha ka babaye ug usa ka lalaki. Pulos sila may dalang mga kinompra nga lutoonon nga mga pagkaon nga gisulod sa plastik.
Sa balay mismo nila ni Colleen gihikay ang mga pagkaon nga ilang bawonon ngadto sa dagat. Nagkadaiyang matang sa mga pagkaon ang ilang giandam. -- Sumpayan pa