Kring-kring! Kring-kring! nibagting ang door bell sa balay ni Frank. May nipindot niini didto sa gate ning sayong kahaponon. Natugaw ang pag-inusara ni Frank nga naglingkod sa sopa sa ilang sala. Nipasiklap siya sa wall clock nga gibitay sa bongbong. Alas dos i-media ang takna. Nagpasalida siya og tv apan wa siya ganahing nitan-aw.
Nibasa siyag mga mantalaan, mga magazine ug mga nobela. Wa gihapon siya siya nalingaw. Usa ka bulan na siyang nag-inusara sa ilang balay. Sukad nibiya si Emma iyang kapikas. Wa pa silay anak. Kay wa pay tuig gikan sa ilang kasal. Bug-at ang paminaw ni Frank sa iyang lawas. Gitapulan siyang molihok. Apan...
"Si Emmma! Si Emma! Basig si Emma diay ron! Nipauli!" tuaw niya sa hilom. Nisidlak iyang mga mata. Nisanag iyang panagway. Unya nalagsik iyang galamhan. Nitindog siya. Nagdali sa iyang tunob padulong sa pultahan.Ug ngadto sa gate pagsugat sa namingawan niyang kapikas.
Nakasala siya sa iyang asawa. Maong gikastigo siya. Ang kastigo -- pagbiya. Nipauli si Emma sa iyang mga ginikanan. Wa siya kapogong sa iyang asawa sa pagbiya. Di niya magamitan og kusog sa pagpogong. Kay sad-an siya. Gani, wa siya nilihay o nanagang dihang gisagpa siya wa’g too ni Emma. Nagluspad siya ug nanglipaghong. Dili tungod sa kahapdos sa mga sagpa. Tungod sa kaulaw.
Lima ka tuig silang uyab. Nagsinaaray sa mabulokong kaugmaon. Lima sab ka tuig tigum ni Frank aron mapondar ning salag sa ilang kaminyoon. House and Lot sa Beth Horon Hills inilang subdivision sa Talamban. Balor og singko milyones ka pesos ang salag sa ilang kaminyoon. Usa ka civil engineer si Frank. Dunay dakong construction firm sa dakbayan. Big time ang iyang mga kliyente nga nagpatukod og mga high rise buildings sa nagkadaiyang dapit sa dakbayan. Di mominus sa napulo ka andana ang mga building.
Usa ka CPA si Emma. Nagtudlo og mga subjects sa Accountancy sa University of San Alfonso.Nahimamat og nakaila ni Frank si Emma dihang ang nauna ang gipatukod og annex building sa nahisgutang unibersidad.
"Maayong hapon, Engineer" matud sa lalaking desente og barog nga nagpolo barong og off white.
Nagbarog siya atubangan sa sirado nga gate nga rehas. May gigunitang mga papeles. Nadismayo si Frank nga dili diay si Emma ang nitimbre sa doorbell.
"Unsay ato Dong?" ni Frank sa laghaw nga tingog.
"Process server ko sa husgado, Engineer. Duna koy ipadawat nimo nga summons" sa lalaki.
"Summons!" nisanting ang dunggan ni Frank nga naghunahuna.
"Kinsa man kahay nikiha nako?" tuaw niya sa hilom.
"Kinsay complainant?" ni Frank. Luya ang tunada sa tingog.
"Si Mrs. Emma Arana" sa lalaki. Nahugno si Frank. Daw nawad-ag umoy iyang mga tuhod.Katumbahon sa iyang gibarogan. Naggunit og hugot sa rehas.
Way laing ang nakaingon ini. Kadto gyung kliyenteng ni-wine and dine ni Frank. Ug ni-order pa gyud og nindot nga GRO.
Wa siya kalikay sa tentasyon. Pwerte man gong nindota bayhana. Gi-overnight gyud ni Frank sa motel. Nakapahimulos siya’s higayon kay out of town si Emma adtong gabhiona. Kay may gitambongang convention sa mga CPA. Kompiyansa si Frank nga wa siya nadaut sa babaye.
Limpiyo gyud diay'ng bayhana! Apan si Emma ang nadaut. Hilantan magabii. Nangatol ang atubangan. Sakitan inig pangihi. Nihubag ang ngabilngabil sa kinatawo. Sa pagpahiling ni Emma sa doctor, nadiksubrehan niya nga may sexually transmitted disease siya.
Nagkurog ang mga kamot ni Frank nga nidawat sa summons. Di mabasa iyang pirma sa papel nga gipapirmahan sa process server isip pagmatuod nga nakadawat siyag summons.
Nabasa niya ang ulohan sa kaso ug mga pulong "Annulment of Marriage". Daw ningitngit ang panan-aw ni Frank. Nalobog ang mga litra. Kay nitulo na diay iyang mga luha. Nanghang iyang mga mata.
"Way laing mabasol ini. Ako ra gyud!" tuaw niya. (Katapusan)