Ang sinugdanan anaa sa kataposan

Mibathay usab ang hilaw nga pahiyom sa panagway ni Colleen. Apan may kasubo nga milugdang sa iyang kasingkasing. Iyang nasuta karon nga intact na kaayo ang relasyon nila ni Cody ug Alexa. Hugot na gayod ang paghinigugmaay sa duha. Ingon sa wala na gayo’y paglaom nga makabaton og katumanan ang gugma ni Colleen nga hilom niyang gitagana alang kang Cody.

Nianang pagkagabii, human sa panihapon, nagtuon si Colleen sa iyang mga leksiyon sulod sa iyang lawak. Apan giabot na hinuon siya’g kalagot kay wala gayod mahasulod sa iyang utok ang iyang gitun-an. Giilog ang iyang kaisipan sa paghunahuna kang Cody.

Gitak-op na lang ni Colleen ang libro nga iyang gitun-an kay dili gayod kini masulod sa iyang ulo. Gipalong niya ang suga sa iyang kuwarto ug mihigda sa iyang kama. Gusto siyang matulog na lang.

Apan dili usab siya makatulog. Nagduladula si Cody sa iyang kaisipan. Sa higayon nga piyongon niya ang iyang mga mata, mopasunding na hinuon sa iyang handurawan ang lilas sa panagway ni Cody nga nagkatawa.

Na-enjoy siya sa ilang panag-uban kaganinang adlawan bisan hamubo lang ang maong higayon. Nalipay siya nga gihatagan siya’g panahon ni Cody. At any rate, naghatag gihapon kini’g importansiya kaniya. -- Sumpayan pa