Naghilak nga Bituon

Mitungha si Flip sa set ug nagpa-interview sa taga media. Gibulgar sa lalaki ang relasyon nila ni Jackie.

Nakugang ang tanan. Ang manager ni Jackie nga si Joy Lorenzo wala malipay sa pagbuto sa maong balita. Naukay ang publiko sa rebelasyon ni Flip. Ug ang UBS-CVN nagduhaduha na paghinayon sa teleserye nila ni Jackie ug Jerome.

Gipatawag si Jackie ni Joy Lorenzo sa gipuy-an niini sa New Manila, Quezon City. Gisukmatan siya sa iyang manager mahitungod sa revelation ni Flip Garcia bahin sa ilang relasyon.

“It was all over the papers,” nagkanayon si Joy Lorenzo. “Ang maong balita nakapakugang pag-ayo sa publiko ug seguradong maapektohan niini ang loveteam ninyo ni Jerome.”

Wala motingog si Jackie.

“Nganong misulod ka man sa usa ka relasyon nga wala magpahibalo nako?” Sukit sa manager kaniya.

“I-I’m sorry,” tubag ni Jackie nga nasagmuyo pag-ayo. “Nagtuo man gud ko sa sinugdan nga dili ko makabaton og problema sa pagpakigrelasyon ko kang Flip tungod kay miuyon man siya sa akong kondisyon nga ililong namo sa publiko ang among relasyon. Karon pa ko nakaamgo nga nasayop ko sa akong pagsalig kaniya.”

“Dakong problema ang gimugna sa rebelasyon ni Flip Garcia. Wala nay mituo nga may relasyon kamo si Jerome sa tinuod nga kinabuhi. Nawad-an sa kahumot ang inyong loveteam tungod kay nagtuo ang publiko nga ato lang silang gitonto. Ug ang management sa UBS-CVN dili morisgo sa ilang kuwarta. Nagplano silang dili na ihinayon ang teleserye ninyo ni Jerome samtang wala pa kini masugdi sa pagpasalida. Anugon kaayo, Jackie.” -- Sumpayan pa