Laygay

Giagak si Gary sa iyang drayber nga si Hec-tor hangtud gyud sa tiilan sa nitso sa lubong ni Fatima iyang maguwang. "Biyae na lang ko, Tor. Moteks lang unya ko nimo kun pakuha na ko. Apan kun dangtag usa ka oras, nga di ko kateks nimo, aria na lang ko" ni Gary sa putolputol ug luyahong tingog. Nitutok una si Hector niya. Tugob sa kalooy iyang tinan-awan.

Wa nay omoy si Gary molakaw nga mao rang usa. Luspad ug daut na kaayo siya. Daw bukog ug panit na lang. Usa ka tuig na siyang ingon niini. Tungod sa dayabitis. Nagpasagad man god siya sa iyang kaadunahan.Kay maka-afford man siyag mintin og tambal, wa niya biyae iyang mga bisyo sa inom ug pamabaye. Wa siya nagmitimiti sa pagkaon. Kaon gihapon siya sa tanang gidili. Wa siya nagpasingot. Kay nagsalig lang sa mga tambal.

Ang ang mga internal organs niya sama sa gorila, atay, kasingkasing, baga ug kidney nga mahimong maigo sa side effects sa mga tambal, wa niya hunahunaa. Tungod sa mga tambal niyang gisaligan, nadaut iyang kidney. Dili na makaserbisyo iyang kidney. Nagkinahanglan na siyag dayalisis katulo sa usa ka semana.

"Sige, sir. Adto lang ko sa sakyanan nga giparking gawas sa gate sa menteryo, maghuwat" ni Hector. Nitalikod.

Nihinay og lakang si Gary paduol sa nitso nga mga lima na lang ka dangaw ang distansiya. Nagsaguyod iyang mga tunob. Di na niya maalsa iyang mga lapalapa.

"Manang. Pasayloa ko!" ni Gary nga niakbo sa tiilan sa nitso. Nikulima ug niping-it pag-ayo iyang nawong. Apan way luhang nanggawas.

"Manang, pasayloa ko. Manang pasayloa ko. Manang pasayloa ko!" nanglugmaw na ang mga luha ni Gary.

Nisiak sa kamingaw sa sam-ang ning sayong kahaponon ang mga agongoy niya. Dulot sa kasingkasing,kalag, kaunoran ug kabukugan ang kamatinud-anon sa iyang pagpangayog pasaylo. Makapanglimbawot sa balhibo iyang tingog.

Na-stroke sa hayblad si Fatima. Naparalisa ang tibook lawas. Napulo ka tuig siyang nagpilit sa banig. Kay nakalalis ni Gary sa wa pa naparalisa ang maguwang, gidumtam niya. Wa gyud niya duawa sa buhi pa. Wa siya nibilar sa paghaya. Wa siya niabay sa paglubong. Gidid-an sab niya iyang asawa’g mga anak sa pagduaw, pagbilar ug pag-abay sa lubong. Kay nakiglalis lang niya, wa na niya ilhang igsoon iyang maguwang.

Karon, si Gary na say dakong masakiton. Nag-antos sa iyang sakit. Gusto na untang mamatay. Apan gilaygay siya. Gipaantos.

"Nagdumot ba kaha ang kalag ni Manang Fatima nako?" Kini ang kadaghan niya napangutana sa iyang kaugalingon.

Ang kaagi ni Gary maingon sa gitawag nga "From rangs to riches". Gradwado lang siyag elementarya pagbiya niya sa ilang lungsod sa Tinamuka. Tungod sa kakabus, nanimpalad siya. Nilangyaw sa Mindanao. Nagpa-boy siya sa usa ka adunahang pamilya. Nagtungha magabii.

Kay hait og salabutan, wa napakyas sa pagtoon. Topnotcher siya sa board exams pagka-CPA. Namanedyer dayon siya sa negosyo sa iyang amo. Nagtudlo siyag Accountancy. Naggunit og mga libro’s dagkong mga kompanya. Gikuha sab siyang Chief Accountant sa usa ka dakong land developer sa Marawi.

Nagtukod sab siyag iyang kaugalingong negosyo. Usa ka construction firm. Nagsweldo siyag mga lisensiyado nga civil engineer, arkitekto, designer, draftsmen, plumber, ug ubang construction workers. Gipatrabaho niya iyang tanang paryente.

Usa ka doctora iyang kapikas ug nahimong company physician sa iyang kompanya. Iyang tulo ka mga anak puro na professional. May doctor, abogado ug CPA. Gipanagaan sab niyag capital nga salapi para sa ilang tagsatagsa ka negosyo.

Tungod sa iyang sakit ug mga bisyo, naanam-anam nag kabangkaruta iyang mga negosyo.Hasta sab ang mga negosyo sa iyang mga anak, sa pagtinabang sa gastohan sa iyang sakit. Dili unta siya gusto nga maangin iyang mga anak. Apan kun malaygay siya, seguradong ma-ut-ut gyud ilang kabtangan.

Gusto siyang mamatay na lang aron mausa ang gastohan. Ug humag lubong niya, makapahuway iyang pamilya sa gastohan.

"Manang, pasayloa ko! Ayaw ko paabtag napulo ka tuig. Gusto na kong mamatay karon!" nagkanayon si Gary. Nagkamuristing iyang nawong sa abog sa nitso nga nabasa sa iyang luha. (Katapusan)