Gula 63
“Yes, but I don’t believe in loveteams. Mao bitaw nga nangulitawo ko nimo tungod kay wala ko motuo nga may relasyon gayod kamo si Jerome in real life. May diyotay kong nasayran mahitungod sa mga gimik sa showbiz tungod kay may higala ako kaniadtong usa ka direktor, the late Lino Rivas. Mao nga nakasabot ko sa sitwasyon ninyo ni Jerome.”
“Kun mabulgar sa publiko nga nakigrelasyon ko nimo, seguradong maapektohan niini ang loveteam namo ni Jerome. Ug posibleng dili na suportahan sa masa ang among loveteam.”
“Nakasabot ko sa matang sa imong trabaho, Jackie. Mao nga okey lang para nako nga nagpadayon ang loveteam ninyo ni Jerome. Ang importante mao nga maangkon ko na ang imong gugma.”
“So, mosugot ka sa akong kondisyon?”
“Nganong dili? I love you very much, busa tumanon ko ang bisan unsa nga gusto mong mahitabo.”
Nagkasinabot sila si Jackie ug Flip mao nga gidawat niya ang gugmang gihalad niini kaniya.
Nahimo gayod nila ni Jackie ug Flip ang pagtago sa ilang relasyon ngadto sa publiko. Very cooperative si Flip kaniya maong milampos gayod sila sa paglilong sa real score tali kanila ilabi na gayod ngadto sa taga media.
Nag-amping pag-ayo si Jackie nga dili makamatikod ang taga media sa sekretong relasyon nila ni Flip. Mao nga dili sila magpakita nga magkuyog sa usa ka publikong lugar. Sagad sa iyang townhouse sa Laguna magkita sila si Flip ug dili usab kanunay. Naningkamot sila paglikay sa intriga. -- Sumpayan pa