Sulagma nga Panagkita

Gula 4

“Kaganina ra ko nga nakapaniid nimo Ronel nga hilomon ka na kaayo,” matud ni Janet samtang gilingi niya makadiyot ang ulitawo nga nagmaneho sa sakyanan. “Nasuko tingali ang imong girlfriend no nga nadugay ka’g uli?” dugang pamahayag ni Janet.

Igo lang milingo-lingo si Ronel. Pagkataud-taud may gamay nang kaisog sa iyang kaugalingon ug gibuak na niya ang iyang pagpakahilom.

“Kuan man gud Jan, wala ko makasabot sa akong gibati nga nasayod nga molarga ka na diay sa Manila. Ikaw man unta ang nakapabuhi pagbalik sa namatay ko na nga gugma human ako budhii sa akong girlfriend, apan mawala ka na usab kanako,” ni Ronel pa nga seryoso kaayo og sinultihan. Daw natuk-an si Janet sa iyang nadungog gikan sa ulitawo. Mao na usab kini ang nahimong amang sulod sa pipila ka segundos. “Wala ka na diay girlfriend karon Ronel? Unsa kadto, gibudhian ka sa imong uyab?” nangutana si Janet.

Gisaysay ni Ronel ang iyang kaagi uban ni Cleofe nga natintal sa anak sa manager sa iyang gitrabahoan. Nagsinaaray na unta sila si Cleofe nga mag-unongay ug dad-on nila sa altar sa kaminyoon ang ilang relasyon, apan kalit siyang gibudhian.

Seryoso kaayo ang ilang pagsultihanay ug wala lang nila damha nga miabot na diay sila sa balay nila ni Janet. “Hapit usa Ronel, ipadayon nato ang pagsultihanay sa sulod,” ni Janet pa ngadto sa ulitawo.

Gidalitan ni Janet og bugnaw nga juice si Ronel. Nagsultihanay sila sa sala. Wala ang mga ginikanan ni Janet kay matag Domingo mosuroy man g’yud kini sa mga mall. Katabang ra ang nahabilin sa balay.

Bisan og wala mangutana si Ronel sa kaagi ni Janet, apan boluntaryo nga gisugilon sa dalaga ang iyang kaagi. Si Janet diay ang mihangyo nga balhinon siya sa Manila kay gisamokan siya sa lalaki nga walay hunong sa pagpanguyab kaniya.

“Kapoy kaayo sa usa ka babaye Ronel kun dunay lalaki nga dili g’yud makasabot kun balibaran,” pasabot ni Janet. Miduko si Ronel, ug pagkataud-taud iyang gitutokan ang panagway sa dalaga.

“Dili tingali ka motoo Jan nga sa una ko pa lang nga pagkakita nimo dihang nagtindog ka duol sa gate sa Cebu Coliseum nga nagpaabot ka sa imong amiga aron motan-aw og concert, nabihag mo dayon ang akong kasing-kasing,” ni Ronel pa.

Nakapahiyom si Janet. (Sumpayan)