Gula 19
“Natural lang na. Unsaon nga ang imong kalibotan tua na man motuyok kang Ate Alexa.”
“Bitaw,” nahikatawa si Cody. Dayong sukna: “Unya, unsa man? Okey ra nimo kun invite-ton tikaw og paniudto?”
Daklit nga naghunahuna si Colleen. Maikog siyang mobalibad ni Cody mao nga gisanong niya ang pagdapit niini.
Didto sila sa foodcourt sa Metro Gaisano. Si Colleen ang gipapili ni Cody kun unsay ilang orderon. Mibalibad unta siya kay maikog siya ni Cody apan namugos ang ulitawo mao nga gipaundayonan na lang niya kini. Siya’y mipili sa mga pagkaon nga ilang orderon.
Si Cody maoy nagsapwang sa tray nga gipatongan sa mga pagkaon nga ilang naorder paingon ngadto sa usa ka bakanteng lamesa nga bag-o lang gihawaan og kustomer. Daghang mga tawo sa Metro Gaisano tungod kay naatol man gyud nga tingpaniudto.
Sa kahiladman ni Colleen, hilom niyang gibati ang kalipay. Nahinangop siya nga naghatag pa gayod diay og bili si Cody kaniya bisan kun hinigugma na kini sa iyang maguwang. Nalipay na lang siya nga bisan tuod dili siya ang gihigugma niini apan naghatag gihapon kini’g dakong pagtagad kaniya. Alang kang Colleen, dako na kaayong butang ang pag-treat ni Cody kaniya og paniudto.
“Nagsige pa ba gihapon og pamisita si Jack kang Alexa?” Nangutana si Cody atol sa ilang pagpangaon. -- Sumpayan pa