Dalagang guwang nga kanunay gilangaw ang bilahan

Sukad lang nga dili na maato og paspas ang duot sa langaw nga manggawas sa may bilahan ni Lisaperang, dili na kini siya ganahan pa mogawas sa ilang balay.

"Unsa kahay bugtong hinungdan niini Nay Porlang nga matag sayo sa buntag maalibwag man sa pagpanggawas kining daghang langaw sa akong bilahan?" ni Lisaperang pa nga giabot og dili tiaw nga kabalaka.

"Resulta na kana anak nga sa imo karong pagka-dalagang guwang adunay manggawas nga baho ug kini dugokon sa langaw!" prangka nga gitubag ni Uray Porlang ang iyang anak.

"Basin dili ka na lang maligo, kay tugnawon ka sa tubig gikan sa atong atabay!"

Usahay makaingon sa iyang kaugalingon si Lisaperang nga insakto ang gisulti kaniya sa iyang inahan.

Sukad lang god nga miabot siya niining edara nga may kalim-an na ug walo, nawad-an na siya og paglaum nga aduna pay lalaki nga mangurso kaniya sa pagpangulitawo.

Dili lang tuyoon nga manglugmaw ang pipila ka lusok sa luha nga modaligdig sa kunoton karon sa aping ni Lisaperang, ang pagbasol kun ngano nga sa diha pa siya sa kanhing kabatan-on iya dayon nga despatsahon og balibad si Onyot, sa panahon nga digahan na siya og amoral diin kini magkanayon.

"Dinhi sa atong balangay sa Lantawan, ikaw ra ug way lain nga babaye nga nakapapitik sa akong kasingkasing, aron ikaw akong higugmaon, Lisaperang!"

Gumikan ba kaha sa naghinubrang pagka-estrikta ug arestokrata og kinaiya ni Lisaperang, iya dayon kining tubagon diin siya magkanayon:

"Ako uroy ang hilasan nimo Onyot, nga magpatuga og pangulitawo kanako... nga anaay imong hitsura ... dili man gayod makaon og iro!"

Mga tuig nga nanglabay, nangahulpa sa laing katuigan, diin si Lisaperang, nagpabilin nga dalagang guwang. Pagbuot ba kaha sa kahitas-an ... sama kang Lisaperang nagpabilin nga ulitawong guwang si Onyot ug tugnaw pay manikop sa uwang sa sapa ... kay wa na man mobalibad si Lisaperang sa dihang gibalikan ni Onyot sa pagpanguyab ug dali ra silang nagkasinabtanay.

Sa unang gabii ... human sa ilang kasal ... dako kaayo og kahibulong si Lisaperang nga wa na gayo’y langaw bisan usa ka buok nga manggawas sa may bilahan sa dalagang guwang nga naminyo ngadto kang Onyot. (Kataposan)