Sulagma nga Panagkita

Gula 3

Gihapit ni Ronel si Janet. Sila na ang nag-uban paingon sa beach sa dakbayan sa Lapulapu. Sila maoy unang nahiabot sa beach. “Hala kanindot sa dagat Ronel! Daku kaayong dagat!”

Nagtiksanay sila si Janet ug ang iyang mga kauban. Paingon na usab sila sa beach. “Hala ka Day…mao ni siya ang imong bag-ong kaplag?” gikomedyahan si Janet sa kauban niya nga si Letty.

Nag-ulhos-ulhos sa pagpangabut ang mga amiga ni Janet. Dunay pipila kanila nga nagdala og tagsa-tagsa nila ka partners. “Tana Ronel maligo na ta!” Giagda ni Janet ang ulitawo.

Miadto si Janet sa dressing room. Paggawas ni Janet daw nagpanilap si Ronel nga nagtan-aw kaniya tungod sa maayo kaayong pagkalalik sa iyang lawas. “Hoy, nganong nagsige ka man og tutok nako?” ni Janet pa nga daw nauwaw.

“Ay, midayeg lang ko sa maayong porma sa ilang lawas Janet. Tana, maligo na ta,” ni Ronel pa nga migunit sa kamot sa dalaga pakanaug sa hagdan nga gihimo ngilit sa pangpang.

Dihang didto na sa ubos nga bahin si Janet, kalit kining milukso ngadto sa tubig. Maayo diay kining molangoy. Wala usab magpabentaha si Ronel, gilangoy niya ang dalaga didto sa dapit nga nahimutangan niini.

“Day, mao kini si Ronel kadtong gibinlan nako sa imong tiket alang sa concert nga wala nimo tambongi,” giingnan ni Janet ang iyang amiga.

Misamot sila kasuod si Ronel ug Janet. May mga higayon nga magkatagbo ang ilang mga tinan-awan. Sa pagpangaon, nagtupad silang duha ug nag-duet pa sa pagkanta sa videoke didto sa beach. “Kanunay ba kamong maligo sa dagat Jan?” gipangutana ni Ronel ang dalaga. “Tagsa ra g’yud tawon kun dunay maka-donate og lechon,” gikomedyahan si Ronel sa usa ka kauban ni Janet.

“Bitaw uy, karon lang ni kay despedida ni namo niya kay balhinon na siya sa Manila isip senior supervisor,” matud sa laing kauban ni Janet. Nakalitan si Ronel ug daw gisubhan ang nagsugod na unta niya nga kalipay.

Nakamatikud ang mga kauban ni Janet nga daw nasubo si Ronel pagkadungog nga adto na idistino sa Manila ang dalaga. “Naguol ka Ron?” matud ni Aisha nga maoy komedyante sa grupo.

Sa ilang pagpamauli, daw nawad-an og kalipay si Ronel. Hilomon kaayo siya ug nakabantay niini si Janet. (Sumpayan)