Uy, Dolor ispoting ug seksi ka na man ron?, timbaya pa ni Tasing samtang nagkakita sila sa usa ka pista sa ilang lungsod. Midugang si Tasing. "Taudtaod na baya kita nga wala gyod magkakita sukad pa sa pagkatapos nato sa elementarya kaniadto. Nalimot ka na ba nako?"
Mapahiyumon kaayo si Tasing ning higayona apan si Dolor wala lang maggunok kay tagabukid kaayo og pamayhon ang mitimbaya kaniya karong higayona.
Nakatapos si Dolor sa pagkamaestra ug bag-ohay lang gani siyang na-promote sa pagka-assistant principal sa eskuylahan sa ilang lungsod.
Og arang-arang sab ang kahimtang sa iyang nabana nga si Selmo kay anak man kini siya og yutaan sa ilang dapit.
Apan si Tasing gumikan sa kawad-on, igo lang intawon nga nakatapos sa elementarya. Usa ka mag-uuma ang iyang nabana nga si Kolas.
"Aw, ikaw ba diay to si Tasing nga pirming kasab-an sa atong maestra nga si Mrs. Ramos kay bulok ug bugo kaayo sa klase?," tubag pa ni Dolor nga ang mga pulong niya daw nagdala og insulto ug nakadala og tunok sa pagkatawo ni Tasing.
Morag giugbok nga kandila si Tasing nga wala makalihok sa iyang gibarogan duol sa lamesa sa mga pagkaon kay pista god.
"Tapos na man ko’g kaon Tasing ug unhan tikag lakaw kay aduna pa koy importanteng adtoon," pananghid pa ni Dolor nga paikid-ikid ang sampot niini padulong og gawas sa gate sa balay ni Mr. Reyes nga maoy naghikay atol sa pista ning higayona.
"Dili ko kaayo magtagad-tagad sa mga tawo nga gagmay ra og grado ug wala’y hibangkaagan kay ma-degrade ko ning kalakiha," nagkanayon si Dolor sa hilom ngadto sa iyang kaugalingon samtang nagakaduol siya sa multicab nga gimaneho sa iyang bana.
Pero, sa wala pa siya makatapos sa iyang kurso miabag og mitabang baya siya sa iyang inahang biyuda nga si Sima sa pagpaninda og mga otanon sa merkado.
Karon nga maestra na siya, nausab na ang iyang batasan. Dili gani niya paduawon ang iyang inahan sa ilang eskuylahan kay tagabukid ug pordoy pa gyod ang pamustora niini.
Usa ka higayon, mihugpa ang makalilisang huwaw kon El Niño. Nangalawos ug nangamatay ang mga tanom lakip na ang mga kamaisan ug mga lagutmon.
Unsa mang hitaboa nga sila si Tasing ug ang bana niini nga si Tonyo daghan mang baligyang mais ug mga lagutmon.
Wala damha, miadto si Dolor sa ilang Tasing aron pagpalit og pagkaon alang sa kunsomo.
"Uy, Ma'am Dolor nasaag man ka sa amo. Sige, dayon ug lingkod," abiabi ni Tasing kaniya.
"Tasing, puwede bang makapalit ko og mais ug mga lagutmon," pamahayag pa ni Dolor sa iyang tuyo ngadto kang Tasing.
"Nganong dili man, managklasmeyt god ta kaniadto sa elementarya. Kumo kay managklasmeyt pahangyoon pa gyod ka nako," tubag pa ni Tasing nga gaan lang gihapon og batasan ug mapahiyumon pa gyod.
Sa hilom, nakatuaw si Dolor sa iyang kaugalingon nga maayo gyod diay nga dili nato usab-usabon ang atong batasan. Mapordoy o madato ba kita ning kalibotan kay lumalabay lang baya ang tawo dinhi.
Likayan nato ang pagkapamahitas-on kay dili baya nato matagna ang dagan sa panahon sama ning atong sugilanon. (Kataposan)