Naghilak nga Bituon

Gula 60

Nahimuot si Jackie sa hilom samtang nagbasa sa text ni Flip. Iya kining gi-reply. Gipasalamatan niya si Flip sa nindot nga mensahe nga gi-text niini kaniya.

Mibangon siya ug migawas sa lawak. Midiretso sa banyo pagkaalingat nga ang orasan nga nagbitay sa bungbong sa sala nagtug-an nga hapit na ang alas siyete sa kabuntagon.

Nagdali-dali siya’g kaligo. May taping siya karong adlawa. Kinahanglan nga makaabot siya sa set sa dili pa ang alas diyes sa buntag. Paabongan niya ang paggikan sa townhouse nga iyang gipuy-an tungod kay seguradong mabara gayod siya sa traffic jam.

Paggawas niya sa banyo human makaligo, midiretso siya sa iyang lawak aron mag-ilis. Maoy iyang naabtan sa iyang pagsulod ang bag-o niyang cellphone (kadtong hinatag ni Flip kaniya) nga nagpunay og bagting. Midali siya pagduol aron tubagon ang nanawag. Apan mihunong kini pagbagting sa dihang iya na kining gipunit.

Si Flip ang nanawag kaniya. Mirehistro ang numero sa cellphone niini sa missed calls sa call register sa cellphone niya. May text usab si Flip nga gipadala kaniya.

Ang text nagkanayon: “F ever u wondered f u touched my soul, yes, u do. Since I met u I’m not d same. U bring life 2 everything I do. Just d way u say hello with I touch I can’t let go, never thought I’d fall n luv with u.” -- Sumpayan pa