Ang sinugdanan anaa sa kataposan

Gula 17

“Oo,” tubag ni Colleen sa pangutana ni Jack. “Sa ako ganing nasayran, nagkasabot na kana silang magminyo.”

“U-unsa?”

“Mao kana’y akong nadungog sa ilang panagsulti kanang mamisita si Cody kang Ate. Naghuwat na lang sila sa resulta sa board exam, ni Cody pagka-magtutudlo ug ni Ate sa pagka-nurse.”

“Yatis! Mabiyaan na gyud diay ko niini?”

“Kun mahinayon ang ilang plano, mao gyud kana’y mahitabo.”

“Sige lang. Di pa gihapon ko mosurender.”

“Unsay buot mong ipasabot?”

“Ipadayon gihapon nako ang pagpangindahay sa gugma sa imong maguwang. Samtang di pa sila makasal si Cody, maglaom gihapon ko nga maangkon ang iyang gugma. Nila pa, mahu’g pa man gani ang kan-on nga ihungit, ang managhigugmaay pa kahay segurado nang magkadayon.”

“Ikaw gud. Basta gisultihan ta na ka sa tinuod.”

“Sus,” ni Jack pa nga nagpangutkot sa ulo niini. “Ngano man gyud nga pilit man kaayo kanang imong maguwang niadtong Cody? Unsa may naa ni Cody nga wa nako?”

Wala motubay si Colleen sa gisulti ni Jack. Pero kun kaniya isukot ang maong pangutana sa lalaki, sayon ra kaayo kining tubagon alang kaniya. Si Cody buotan, ambongan, utokan ug perfect gentleman kaayo. Samtang si Jack postura ray nag-ayo, walay sulod ang ulo. Suheto siya niini tungod kay bisan nauna kini niya’g eskuyla og usa ka tuig apan nagkaklasmet sila sa usa ka subject sa second year college pa siya. -- Sumpayan pa