Batan-ong Ina-ina

Gula 7

Nahibulong ug wala makasabot si David kun ngano nga miingon ang iyang anak nga nakasala kini kaniya.    

“Mora’g salabtonon kaayo ang imong gisulti kanako Dong. Yuna, pwede ba nga dili ka lang karon motungha kay mauwaw kita sa imong gisul-ob nga bulingon na. Ipananghid ko lang ikaw sa imong maestra,” giingnan ni David si Rosel.

Wala na motingog pa si Rosel. Nanulod sila sa kan-anan atbang sa tunghaan diin wala pa kaayo’y mga customers. Didto gisaysay ni Rosel sa iyang amahan ang rason ngano nga dili na siya ganahan nga mopauli.

Nakapanglingo-lingo si David nga naminaw sa saysay sa iyang anak. “Salbahis nga Carina. Plano na man gani unta nako nga pakaslan siya apan tungod sa iyang gibuhat,” wala mahimutang si David.

Nag-inusara nga mipauli si Rosel sa ilang balay. Mingaw ang balay sa iyang pagsaka. Mideritso siya’g sulod sa iyang kwarto. Gihukas dayon ni Rosel ang iyang sinena aron mag-ilis. Dihang isul-ob na unta niya ang limpyo niyang sapot, naabli ang pultahan nga nalimtan diay niya pag-lock.

“Rosel? Dia ka na diay? Diin ka man Dong natagbaw baya si Papa nimo og pangita gabii,” matud ni Carina nga miduol kaniya. Gigakus ni Carina si Rosel nga wala pa makasul-ob sa iyang sinena.

“Kita ra karon dinhi Rosel… ayaw ko’g balibari,” daw miparayeg pag-ayo si Carina kang Rosel nga misuway sa pagwakli kaniya. Gigakus ni Carina si Rosel unya gihagkan. Apan nakurat si Carina dihang miabli ang pultahan ug nakita niya ang amahan ni Rosel.

“Love! Dia ka lagi?,” daw nahilaw si Carina sa kauwaw. “Maluibon ka g’yud diay Carina. Buot ko unta ikaw nga tabangan aron magbag-o na sa imong kinabuhi, apan nagpabilin nga wala mausab ang imong batasan!”

Naghilak si Carina nga nangayo’g pasaylo. “Nasayud na ako sa hinungdan ngano nga wala na’y gana nga mopauli dinhi si Rosel mao nga gikan karon, ayaw na pakita kanako. Pusta ang imong mga sapot ug layas!” gisingkahan ni David si Carina.

Human makabiya si Carina sa balay nga naghilak, gigakus ni Rosel ang iyang amahan. “Pasayloa ko Pa, dili nako tinuyoan ang hitabo.” Gipikpik ni David ang buko-buko sa anak ug giam-aman. “Salamat Rosel nga mentras sayo pa, gitabangan mo ako pagsuta kun nausab na ba ang batasan sa babaye nga buot ko na unta nga pakaslan.” (Kataposan)