Gula 15
“O-okey,” lugos makagula ang tingog ni Brendan, kaha tungod sa kahisagmuyo.
Nasabot ni Colleen ang gibati sa ulitawo. Mao nga pag-abot niya sa unibersidad nga iyang gitunghaan, gi-text niya si Brendan segun sa iyang gisaad ngadto niini. Iya kining gipadad-an og kataw-anan nga graphics.
Abtik nga mi-reply si Brendan sa iyang text. Pero wala na niya tubaga ang maong text sa ulitawo.
Nianang Sabado sa gabii, nahibutho si Jack sa pinuy-anan nila ni Colleen. Si Alexa ang tuyo ni Jack. Dugay nang nangulitawo si Jack sa iyang maguwang. Sa iyang paniid, mora’g una pang nangulitawo si Jack kang Alexa kay kang Cody. Si Cody lang ang gisuwerte nga maoy gisugot sa iyang maguwang.
Pero bisan kapila na balibari ni Alexa si Jack, nagpadayon gihapon kini sa pagpangulitawo sa maguwang ni Colleen. Wala pa gayod mosurender ang ulitawo sa tinguha niini nga maangkon ang gugma ni Alexa.
Kun si Collen ang papilion hain nila ni Jack ug Cody ang angay sa iyang maguwang, mas pabor siya kang Cody. Bisan og anak og adunahan si Jack apan may pagkahuwabon ang maong lalaki, butang nga wala mauyoni ni Collen niini. Mao usab tingali kini ang hinungdan nga wala kini sugta ni Alexa.
Niining gabhiona, nagdumili si Alexa sa pagpakig-atubang kang Jack nga namisita niini. Si Colleen maoy giduol sa iyang maguwang. Gihangyo siya niini nga maoy moatubang kang Jack. -- Sumpayan pa