Ang sinugdanan anaa sa kataposan

Gula 13

Bakak ang mao niyang katarongan. Kay ang tinuod, dugay na niyang giandam ang iyang kaugalingon sa pagpakig-relasyon og opposite sex. Ugaling lang kay ang lalaki nga maoy iyang giandaman sa iyang kasingkasing didto man mahigugma sa lain. Si Cody! Si Alexa ang gihigugma ni Cody ug dili siya!

Kun si Brendan mao pa lang unta si Cody, dugay ra niyang gidawat ang gugmang gihalad niini kaniya. Dugay ra unta silang nagkarelasyon. Apan lisod kaayong tudloan ang iyang kasingkasing. Dili siya makabuot sa pinitik niini nga si Cody gayod ang gipahinungdan.

Maikog lang siyang moprangka kang Brendan nga wala gayod siya mahigugma ngadto niini. Nasayod siya nga sakitan gayod si Brendan kun iya kining buhaton. Mao nga iya lang gilubag og diyotay ang iyang balibad sa matuod unta niyang igsusulti ngadto niini.

“Pangita na lang og laing babaye, Brendan,” ni Colleen pa, “nga imong kataklian sa imong gugma.”

“Ayaw ko ihatag sa lain, Colleen,” matud ni Brendan. “Ikaw ang akong gihigugma. Tinud-anay ning akong tuyo nimo. Dili ko mag-antos sa pagpaabot sulod sa dugay’ng panahon kun wa pa ko mahigugma nimo sa tinud-anay.”

“Pero di ko makahimo pagdawat sa imong gugma. Di pa ko gusto’g commitment ngadto sa usa ka lalaki.”

“Di ka gusto’g commitment o wa ka gyud mahigugma nako?” -- Sumpayan pa