Ang tikarol

Mainampingon nga misuot si Ernie ilawom sa katunggan ug maoy gipunteriya niya ang labing dakong punoan sa pagatpat, kansang tungatungang bahin sa dakong sanga niini gilibotan sa bagang patong. Nagtuo si Ernie nga ang maong patong mao ang gilungagan sa tikarol, isip salag sa kilas nga langgam.

"Huh! Impas ka na gayod karong tikarola ka ning bala sa akong tirador...!" nagpaminti si Ernie nga mihupo sa kanait nga punoan sa pagatpat. Ang iyang walang palad nagkupot na sa panga sa iyang tirador ug mga tudlo sa tuong kamot nagkupot na usab sa panit sa tirador nga nag-ugom na sa linging bato nga maoy bala niini.

"Dili diay ka mamasol, Nie...?" sukot sa asawa ni Ernie kaganiha nga si Ebyang, human sa ilang paniudto sa pinong kan-ong mais ug lamay-lamay nga utan. "Imbes pasol ang imong dalhon, tirador man hinuon ang gibitbit mo...!"

Gipasabot ni Ernie si Ebyang nga padayong naghungit og pagkaon sa una nilang liwat nga si Meloy nga mitungtong na sa 5 anyos.

"Tiradoron ko una kanang siaw nga tikarol, Byang! Lawgaw ug disturbo nang langgama sa akong pagpamasol! Imbes makakubit ko’g mga isda, ang tikarol na nuon ang mokubit sa paslonon kong isda kay sakdapan man dayon! Tigaw kaayong langgama! Tinuod gyud nga kingfisher nang langgama...!"

Tungod kay limpiyo na ang luna sa banika ni Ernie nga naghulat na sa panuig nga ulan aron kapugsan, nahimo niyang kalingawan ang pagpamasol matag udto, alang sa sud-anon nila ni Ebyang ug Meloy sa panihapon. Iniglantong sa taubon, adto magtungtong si Ernie sa dakong guk-ong nga bato, atbang sa pagatpatan. Pirmeng debuynason si Ernie sa iyang pagpamasol. Isdang pugapo, katambak ug mamsa ang iyang mapasol. Apan dihang mikalit pagsiaw ang langgam tikarol nga kilas kaayong mosakdap ug modayib haduol sa guk-ong nga bato nga nahimutangan ni Ernie, wala nay mga isdang mokubit sa pasol. Ang tikarol maoy motugaw sa mga isda sa palibot ni Ernie, nga abtik kaayong mokubit sa mga isda pinaagi sa taas ug hait niining sungo. Human makakubit og isda ang taas nga sungo, malipayong mopreno sa paglupad ang tikarol ug motugdon dayon sa labing dakong punoan sa pagatpat sa atbang. Hilom nga naglagot si Ernie sa tikarol. Nakahukom dayon siya sa pagtirador niini.

Mingisi si Ernie. Mikapakapa ang pako sa tikarol nga mitugdon sa dakong sanga sa pagatpat. Ang taas nga sungo niini, nagtangag na usab sa kinubit nga isda. Nalantaw ni Ernie nga gituhiktuhik dayon sa tikarol ang gitangag nga isda ug mitugdon sa bagang patong nga may lungag.

Giinat dayon ni Ernie ang goma sa iyang tirador ug gihugtan pagkupot ang panit sa tirador nga nag-ugom sa linging bato nga bala. Apan napahunong siya. Nakita niya ang paglugwa sa lungag sa patong sa bugtong kuyabog sa tikarol. Giul-ogan dayon kini sa inahang tikarol sa unod sa isda nga gisalay na sa nagsanggaka nga sanga sa pagatpat.

"Tittt...!Twitttt...!Twitttt....!" malipayon kaayo ang kuyabog sa tikarol nga nagpaul-og sa inahang tikarol. Kalit nga nausab ang hukom ni Ernie. Mibiya siya sa iyang gihup-an nga wala tiradora ang tikarol. Sa pamayhon sa inahang tikarol ug sa kuyabog niini, daw naaninaw niya ang iyang asawa nga naghungit ug nagpakaon sa bugtong nilang anak. Miluag ang dughan ni Ernie nga mipauli sa ilang balay. (Kataposan)