Ang sinugdanan anaa sa kataposan

Gula 11

Nianang pagkaugma, human sa ikaduhang klase ni Colleen sa buntag, migawas si Colleen sa unibersidad nga iyang gitunghaan. Vacant period niya ug nakahunahuna siyang mosuroy sa Elizabeth Mall nga dili ra usab layo sa iyang eskuylahan.

Nanan-aw tan-aw siya sa mga cellphone outlets. Unya mibalhin na usab siya ngadto sa alahasan. Wala siya’y planong mopalit. Gusto lang siyang magpalabay sa oras samtang naghulat sa sunod niyang klase.

Dihang gipul-an na siya’g tan-aw sa gi-display nga mga alahas, mibalhin na usab siya sa outlets sa mga cosmetics. Nanan-aw tan-aw sa mga produkto nga gibaligya. Ang ubang mga produkto nga medyo makakabig sa iyang interes, iyang puniton ug ablihan aron simhoton pagsuta sa kahumot niini.

Giabot siya’g kakapoy sa nadugay na niyang pagsuroy-suroy. Miadto siya sa foodcourt aron makalingkod. Dili kaayo daghan ang nangaon niadtong tungora busa daghan kaayo ang bakanteng mga lingkoranan. Milingkod si Colleen sa usa ka lingkoranan nga nalayo og diyotay sa mga tawo nga nangaon.

Nakugang siya dihang kalit lang mitunga si Brendan sa iyang atubangan.

“Puydeng makig-share og table?” Nagkanayon si Brendan nga nagpahiyom kaniya.

“Sure,” mubo niyang tubag.

Milingkod si Brendan sa iyang atbang diin mao ray nag-uwang kanila ang lamesa. Gipatong ni Brendan ang dala niining mga notebooks ug libro tupad sa mga gamit ni Colleen sa eskuylahan nga gipatong sab sa ibabaw sa lamesa. -- Sumpayan pa