Naghilak nga Bituon

Gula 53

Ang sunod niyang gisulod mao ang outlet sa Celine. Gikan didto, misulod siya sa lainlaing outlet sa signature nga mga produkto. Hangtod nga mihilab ang iyang tiyan sa kagutom.

Misulod siya sa usa ka French restaurant nga diha ra usab sa sulod sa Glorrietta. Nakakita dayon siya og lamesa nga bag-o lang gyud nabakante. Gani nanghipos pa ang waiter sa kinan-an sa namiya nga mga kustomer. Miyango siya sa waiter human niini ayoha og trapo ang lamesa. Mipahiluna siya ug gitamdan ang menu book.

Dihang nakapili na siya’g orderon nga pagkaon, gitawag niya ang waiter. Miduol dayon kini kaniya. Human niya kini tug-ani sa mga pagkaon nga iyang orderon, mibiya dayon kini kaniya.

Samtang naghulat nga ihatod ang iyang gi-order, dihay ambongang lalaki nga miduol sa iyang nahimutangan.

“Hi!” Timbaya sa lalaki nga nagpahiyom samtang nagbarog sa iyang atubangan.

“Hello!” Mibalos siya pagtimbaya.

Nakaalinggat dayon si Jackie nga ambongan ang maong lalaki. Desente kaayo’g barog. Sa iyang banabana, dul-an na sa trayenta ang edad niini.

“Kun wala ko masayop, ikaw si Jackie Rojas?’ Bisaya sab diay ang maong lalaki.

“Y-yes,” ni Jackie pa nga nahingangha. “Nga-nganong nakaila ka man nako?” -- Sumpayan pa