Batan-ong Ina-ina

Gula 1

Wala pa gani tuig gikan sa pagkamatay sa inahan ni Rosel, giilisan dayon kini sa iyang amahan og usa ka batan-on kaayong babaye. Nakurat na lang si Rosel kay pag-abot niya gikan sa tunghaan may babaye na man sa ilang balay.

Bugtong anak si Rosel ug 16-anyos na siya nga nagtungha sa ika-upat nga ang-ang sa high school. “Buotan si Carina nga pagka-babaye Rosel. Kay wala na man si Mama nimo, isipa siya nga imong tinuod nga inahan,” gipasabot ni David ang iyang anak.

Kapin pa lang sa 30-anyos si Carina ug batan-on kaayong dalaga kun tan-awon kay gamayon kini nga pagka-babaye. Wala tuod masayop si Rosel kay buotan si Carina. Mao gani kini ang moandam sa iyang pagkaon nga bawon para sa tunghaan.

Si Carina usab ang mohatag kaniya og kuwarta nga bawon mata’g adlaw kay mao man kini ang gipatipig sa iyang amahan sa iyang kinitaan. Diha’y higayon nga gihilantan si Rosel ug kay maayo man kini mopisil, namalihog si David nga iya kining pisilon.

Nahuwasan tuod dayon si Rosel human og pisil ni Carina. “Salamat kaayo Mommy Carin ha kay nahuwasan tuod ko sa hilanat human ko nimo gipisil. Sagdi lang pisilon usab tika unya kun hilantan ka.”

Nanglabay pa ang daghang mga buwan, wala na maniglain si Rosel kang Carina nga giila niya nga ina-ina. Usa ka hapon, mingaw ang balay dihang nahiabot si Rosel gikan sa tunghaan.

Nahibulong siya kay dili kini kasagaran. Sagad nga magtikaw-tikaw man gyud si Carina sa balay o sa palibot mata’g abot niya sa hapon. Una nga mahiabot si Rosel sa iyang Papa David nga usahay magabhian pagpauli.

Wala gitrangkahan ang pultahan. Abli usab ang pultahan sa lawak ni Papa niya David ug Carina. Gitan-aw ni Rosel ang kuwarto ug nakita niya si Carina nga naghigda, naglukob og habol nga nawong ra ang gipagawas.

“Rosel… dia ka na diay, gihilantan ko Dong, gitakigan ko,” hinay ang tingog ni Carina. Kalit misantop sa huna-huna ni Rosel nga dihang gihilantan siya kaniadto, si Carina ang nagpisil kaniya.

“Mag-ilis usa ko Mommy Carin ha, mobalik dayon ko kay pisilon tika aron ka mahuwasan,” matud ni Rosel nga nagdali pag-adto sa iyang kuwarto. Human siya maka-ilis og pangbalay mibalik dayon si Rosel sa kuwarto sa iyang amahan ug ni Carina.

Gikuha niya ang panghaplas sa tukador ug misugod pagmasahe sa iyang ina-ina. (Sumpayan)