Lab-as kaayo

Gula 4

Wala pa g'yud sila makakita'g kapasilongan mao nga padayon si Abel nga nagpadagan sa motorsiklo. Sa unahan, may nakita sila nga mga passenger jeepney nga giparking daplin sa karsada.

Gipahunong dayon ni Abel ang motorsiklo ug mipaingon sila sa luyo nga bahin sa PUJ. Apan may gitabil nga silopin sa luyo. Gitukas dayon kini ni Abel ug gipasulod niya si Marjorie ug dayon misunod usab siya pagsulod sa jeep.

Mikusog g'yud ang pagbunok sa uwan. "Basa man ang imong jacket Mar, hukasa lang na kay mosamot ang kabugnaw kun dili nimo kana hukason," giingnan ni Abel ang dalaga. Gitabangan niya ang dalaga sa paghukas sa iyang jacket ug gitrapohan niya ang bukton ug paa niini pinaagi sa umog-umog nga jacket. Sa hilom gikahimuot ni Abel ang sitwasyon kay gikauban man niya si Marjorie niining bugnaw nga kagabhion.

Mingaw kaayo ang palibot samtang padayon ang kusog kaayong uwan. "Kusuga sa uwan uy. Maayo gani kay dunay tabil ang mga bentana aning maong PUJ kay kun wala pa mabasa gihapon ta unya tugnaw pa g'yud," ni Marjorie pa. "Bitaw," mubo nga tubag ni Abel. "Kanindot unta kun uyab pa ta Mar no unya nia ta dinhi atol niining panahona," pasakalye ni Abel. "Hmmm, mao g'yud," wala kaayo motubag si Marjorie.

"Pagsulti lang Mar ha kun tugnawon ka na'g maayo kay gakson lang tika para pagwagtang sa katugnaw," laing pasakalye ni Abel. Bisan og nadungog ni Abel kaganina sa pagsultihanay ni Marjorie ug sa iyang amiga didto sa Kalunasan nga wala na kini hinigugma, iya gihapon kining gipangutana.

"Panagsa ra diay nga mo-text nimo ang imong uyab Mar?" matud ni Abel. "Buwag na man mi Bel.. two months na," tubag ni Marjorie.

Nasabut ni Abel nga daw naghatag og giya kaniya ang dalaga.

Misamot pa g'yud ang pagbunok sa uwan. "Tugnawa na uy," ni Marjorie pa nga daw hinay-hinay na nga nakabatyag og katugnaw. Wala palabya ni Abel ang higayon. Hinay niya nga giaswat ang iyang tuo nga kamot ug gibutang sa hawakan ni Marjorie.

"Sibog ngari duol nako para mainitan ang imong lawas Mar," ni Abel pa. Apan wala pa gani makalihok si Marjorie, hinay-hinay na nga gigakus ni Abel ang dalaga. Gakus nga tugob sa pagmahal. Napasandig si Marjorie sa dughan ni Abel samtang ang duha ka bukton sa lalaki nagbaliktus sa hawakan nga bahin sa dalaga. (Sumpayan)