Gula 5
“M-maayong gabii sab,” lugos maukab ang baba ni Colleen. “Ug maayong gabii sab kanimo, Ate.”
“Maayong gabii sab,” tubag ni Alexa. Panihapon na. Nakaseguro kong gigutom ka na.”
“Oo, Ate...”
Gitalikdan niya ang duha ug misulod siya sa iyang lawak. Giserad-an niya ang pultahan niini ug nag-ilis siya’g sapot nga pangbalay. Human makailis, migawas siya sa lawak ug miadto sa kosina aron mukaon. Tinuod nga mihilab na ang iyang tiyan sa kagutom.
Pero wala mahinultol si Collen sa pagkaon. Ang iyang pagtagad didto ra nila ni Cody ug Alex nga naghagwaay sa sala. Wala niya kalikayi nga maikag sa ilang kamalipayon. Sa hilom nasina siya sa iyang maguwang nga nakabaton og ambongan ug buotan nga hinigugma.
May gitagoan nga pagbati si Colleen alang kang Cody. Hilom siyang nakagusto sa hinigugma sa iyang maguwang. Dugay na niyang gitan-ogan kining pagbatia. Gipaningkamotan niya nga dili mabutyag tungod kay dili siya gustong makamugna og kasamok sa relasyon nila ni Cody ug Alexa.
Gimahal ni Colleen ang iyang maguwang. Pinangga usab siya ni Alexa. Hugot kaayo ang ilang kasuod isip managsuon. Ug dili buot si Colleen nga magkabangi ang mga kabubut-on nila ni Alexa tungod lang sa usa ka lalaki.
Si Colleen ang nahimong taytayan kun nganong nagkahigugmaay sila si Alexa ug Cody. Unang nakigsuod si Cody kaniya sa wala pa kini mangulitawo ngadto ni Alexa. Nagtuo gani siya nga nakagusto si Cody kaniya sa sinugdanan tungod kay nakigsuod man gayod kini niya’g maayo. Nakugang na lang si Colleen sa iyang pagkasayod nga gipangulitawhan na ni Cody ang iyang maguwang. -- Sumpayan pa