Gula 4
Wala mamugos si Brendan. Apan nianang pagkaugma, giatangan gihapon si Colleen ni Brendan sa gawas sa unibersidad nga iyang gitunghaan. Mihagad kini niya pag-usab nga manan-aw sila’g sine. Wala na makabalibad si Colleen ilabi na nga may bakante na man usab siyang oras.
“Manggawas lang ta sa sinehan before 5:30, ha,” matud ni Colleen. “May klase pa man gud ko hangtod 8:30 sa gabii.”
Miuyon si Brendan. Sa Elizabeth Mall, nanan-aw sila’g sine. Pelikulang English ang ilang gitan-aw. Untop alas singko sa hapon dihang nanggawas sila sa sinehan.
Alas nuybe sa gabii. Maoy paghiuli ni Colleen gikan sa eskuylahan. Ang kataposan niyang klase nahuman sa alas otso imedya. Angay unta nga wala pay alas nuybe nahiabot na siya sa ilang gipuy-an sa Banawa. Apan gumikan sa kahuot sa trapiko ug sa kadaghan sa nag-ilogay nga mga pasahero, dugay siyang nakasakay.
Paghikanaog niya sa traysikol nga naghatod kaniya gikan sa eskina nga gihunongan sa dyip nga iyang gisakyan, midiretso siya’g sulod sa lagwerta sa ilang balay nga gikoral lang sa linipak nga kawayan. Nakita niya nga nagsiga pa ang suga sa sala.
Midiretso siya pagsulod. Apan napahunong siya sa paghimuntog niya sa may sala. Maoy misugat sa iyang panan-aw sila si Cody ug Alexa nga nagtupad sa pagpanglingkod sa sopa ug naggunitanay sa mga kamot. Nakalitan siya sa iyang nakita. Wala siya magdahom nga bisita diay sa iyang maguwang ang hinigugma niini.
“Maayong gabii,” mitimbaya si Cody kaniya. -- Sumpayan pa