Titser ko, uyab ko

Transfer ko Ma'am gikan sa Manila, matud ni Ricardo nga mitunol sa iyang card ngadto kang Miss Nora Solon. Miyanghag ang dalagang titser sa ambongang estudyante, pila nay imong edad, Manoy?

"Tawga lang ko'g Ricardo, ma'am, beinte otso na ko."

Gilista ni Miss Solon si Ricardo sa iyang record sa mga estudyante,ug nangutana sa lalaki.

"Unsa may hinungdan Ricardo nga miabot ka man og beinto otso nga grade six ka man gihapon?"

"Akoy bread-winner sa amo, ma'am kay patay naman ang akong amahan ug upat ming magsoon, akoy kamagulangan."

"Hain naman ang imong mga igsoon?"

"Silang tolo ma'am, human sa ilang pagtuon busa sila na usab ang migasto nako."

Nianang gabhiona, wala dayon makatulog si Nora nga naghunahuna sa ambongang si Ricardo.

"Kaniadot sa brown niyang mga mata," nagsulti ang dalaga nga nag-inusara sa iyang lawak.

"Luoy kaayo siya ug buotan ug aghop ang iyang hitsura." Manghod lang siya og duha ka tuig sa lalaki. Tungang gabii na tingali sa dihang nahikatulog si Nora.

Milabay ang tulo ka bulan. "Ma'am, mahimo bang makigsulti ko nimo unya human sa atong klase?"

"Sa unsa man unta, Ricardo?"

"Unya nalang ma'am sa hapon."

"O, sige, ihatod ko sa akong gikaserahan kay adto ta magsulti."

"Ma'am," misugod si Ricardo human siya palingkora sa sofa atubangan sa iyang titser, "ako untang hulaton ang among graduation una tika sultihi nga mahal ko ikaw ma'am, apan nahadlok ako nga basin og maunhan ko sa uban."

"Paabota una ang imong graduation, Ricardo, aron dili mabalda ang imong pagtuon kay anugon kaayo, bright ka ra ba."

"Maunhan unya ko's uban, ma'am, maong gisultihan ta lang kang daan ma'am."

"Ayaw kabalaka kay dili ka maunhan sa uban basta humana una kining elementarya, aron dili na kaayo problema kon sa high school ka na," iyang gipasaligan ang iyang estudyante.

Milabay pa ang mga bulan.

"Congratulation, Ricardo, ikaw ang Valedictorian karong tuiga," ni Nora nga milamano sa iyang estudyante.

"Unya, kadtong imong gisaad, ma'am?"

"Nga unsa?"

"Nga walay makauna nako."

"Kay wa bitaw, ikaw may na ka-una."

"Buot nimong ipasabot, ma'am nga uyab na ta?"

"Unsa pa man diay imong pagtuo?

"Kanus-a man ta magpakasal, ma'am?"

"Unsay kasal? Humana una ang high school, una ta magpakasal kay sa college, ako na ang mogasto nimo."

Wala kapugngi ni Ricardo ang pagakos niya sa iyang titser kay uyab na gyud niya ang iyang titser. (Katapusan)