Gula 43
Gipasabot niya ang iyang mga ginikanan nga walay basehanan ang migawas nga balita nga siya kaslonon na ngadto sa iyang ka-loveteam nga si Jerome Celesta. Gipatin-aw ni Jackie ngadto kanila nga gimik lang sa ilang manager ang maong balita aron mokita og dako ang umaabot nilang pelikula.
Lakip si Gilda nanawag usab kang Jackie aron klarohon ang maong isyu. Gipasabot usab ni Jackie si Gilda nga pulos lang intriga ang mga isyu nga nanggawas sa mga pamantalaan ug gisibya sa mga radyo ug telebisyon.
Sa panagsulti nila ni Jackie ug Gilda sa cellphone, nalakbitan sa naulahi nga si Ethan wala na magguwardiya sa bangko nga gialagaran niini. Nagpabalhin na kini og laing assignment. Hinuon, makabalita gihapon si Gilda mahitungod sa kalihokan ni Ethan tungod kay ang guwardiya nga napuli sa ulitawo silingan ra man usab niini sa Mandaue.
Wala maikag si Jackie sa gibalita ni Gilda kaniya mahitungod kang Ethan. Ingon sa nawad-an na siya’g interes nga makakuha’g kasayoran bahin sa kalihokan ni Ethan didto sa Sugbo.
“Ayaw na siya’g hisgoti, Day,” matud ni Jackie.
“U-unsa?” Nakugang si Gilda. “Dili ba gusto ka man nga makakuha’g impormasyon mahitungod kang Ethan?”
“Kaniadto, pero karon dili na.”
“Really?”
“Yes. Gitapos ko na ang pagpakabuang ko kaniya. Dili ko hungog nga magsige’g gukod-gukod niya. Kun dili siya nako, aw dili na sab ko niya.” -- Sumpayan pa