Mobayad bisa'g pila

Pila may acceptance fee nimo, gaw? Nagtugon si papa Ador nga mobayad siya bisa’g pila ni Isaac nga naglingkod sa lingkuranan dikit sa lamesa ni Atty. Rey Gingco. Nag-atubang si Rey ug Isaac ning alas nuybe sa buntag sulod sa bupete sa abogado. Tupad ni Isaac og lingkod iyang kapikas nga si Juliet nga maoy dunay kaso. Gihilasan si Rey nga naminaw sa pulong sa ig-agaw.

Dili ni sila first degree nga mag-agaw. Mahulog lang og ig-agaw sa panag-agawan. Kay ang amahan ni Rey ig-agaw ni Ador amahan ni Isaac. Dugay nang naglungotlungot si Rey sa katihik, kadawo ug kahambogero sa iyang uyoan.

Retirado nga polis si Ador. Kay nag-ilang paryente si Rey, siya ang naghikay sa tanang papeles gikinahanglan sa pag-retire ni Ador. Wa lang sab nisitar nga pasuhol. Kay kining pangutok, batasan ug kultura sa probinsiya, kun dunay ranggo ang tawo, obligasyon niyang motabang sa mga paryente. "Inig kadawat nako sa akong retirement Rey, ikaw una nakong bisitahan. Mag-good time ta. Sky is the limit" panaad ni Ador nga opaw na ug may dakong uwat sa agtang tapsing sa bala sa engkwentro niya’g mga tulisan kaniadto. Hapit kada adlaw siyang mobisita sa abogado aron magpahimo ug magpanotaryo’g dokumento. Nipahiyom lang si Rey sa panaad sa uyoan. Matuman ug sa dili, wa man siya’y hilig mangayo’g pabor sa uyoan.

Pagkobra gyud sa retirement sa uyoan, wa gyu’y Ador nga nitunga sa bupete sa abogado. Bisan na la’g teks nga pasalamat sa tabang sa abogado. Nalimot na gyud sa saad. Apan nahimadlan na man daan ni Rey ang kinaiya sa uyoan. Ang iya lang gikaluoy si Isaac nga buotang pagkaanak. Nakaobserbar man gud si Rey nga kasagaran sa amahang salbahis, mga buotan og mga anak. Nisurok lang gyud ang dugo ni Rey sa iyang uyoan kay nakadungog siya nga pagkadawat niya’s iyang retirement benefits, wa gani patilawa iyang mga kaubang polis bisa’g usa na lang ka buok inasal. Pwerte gyung dawoa tawhana. Di si            Rey katoo nga mobayad bisa’g pila.

Samtang nag-uma si Isaac sa ilang umahan sa baryo Valledupar, nag-sideline siya’g drayeb og traysikol. Kay gikaluoy sa amahan nga gipalitan og traysikol. Si Juliet part-time nga maid sa usa ka doctor nilang silingan. Kay kapritsosa bayhana (mora’g GRO gikan sa beerhouse nga estambayan ni Isaac), naakusar nga nangawat og alahas sa doctor. Giimbistigar sa polis, ninigar sa sinugdan. Apan nipirma og Affidavit of Loss sa mga resibo sa prinda sa ahensiya. Niangkon siyang giprinda niya ang mga alahas nga balor og trayenta mil pesos. Nibayad pa gyud og kinse mil pesos aron maareglo.

Dihang nakadawat og subpoena gikan sa opisina sa fiscal kay gikiha’g Qualified Theft si Juliet, niduol ni Rey ang managtiayon. "Akong acceptance fee ining kasoha, P30,000. Apan ang ibayad og acceptance fee, maayo ibayad nalang sa areglo. Kay subidahon man ning kasoha. Niangkon na man si Juliet nga iyang giprinda ang mga alahas. Busa aron segurong di mo mapildi sa kaso, bayran nalang ang alahas. Seguradong areglo. Kay sa mosukol ta’g kaso nga dako’g acceptance fee sa abogado, wa pa gyu’y segurong modaug" ni Rey, samtang nagbasa'g subpoena.

"Wa diay purohan gaw? Di diay na depensa nga gihulga si Juliet sa mga polis?" sukot ni Isaac. Nagminghoy. "Kun may purohan pa gaw, sultihan tika. Unya dawaton nako ang trayenta mil nga ibayad sa tihik ug dawo nimong amahan. Apan sayang lang ang trayenta mil. Kay mapildi ra man ta. Kuyaw og ma-Munti imong seksing kapikas. Mas maayo mobayad nalang kay kinse mil na man lang ang kulang" ni Rey nga nagpahiyom. Di kamaong mopabuhi’g dugo.

"Na hala gaw. Pasensiya nalang sa among dala gikan sa probinsiya. Nia gawas sa pultahan sa imong bupete. Ipasulod lang unya ning usa ka bulig saging kardaba, usa ka galong suka gikan sa tuba ug usa ka galong bag-ong dawat" ni Isaac. Mapahiyomon ug mapasegarbohon. "Salamat gaw" ni Rey. "Ako lang unyang pahibaw-on si papa sa imong tambag" ni Isaac. Nitindog. "Salamat, attorney" ni Juliet. Nitindog sab. Ug naggunitay ang bana’g asawa nga naglakaw padulong sa pultahan sa bupete. Gisundan ni Rey og tan-aw ang managtiayon. Nakapanglingo siya. (Kataposan) (Sa gusto’g libreng konsulta, dad-a ning pahina sa opisina sa tagsulat. Sa Sabado sa buntag)