Bawion ko ang imong gugma

Gula 84

Nagtuo si Annie nga mipatuo si Edelmar sa iyang gisulti. Apan usa niana ka adlaw, nakugang na lang siya kay gipahibalo siya ni Edelmar nga gitakda na ang adlaw sa paggikan niini paingon sa London.

“Magtuman ka gyud diay sa imong gusto?” gahi ang tingog ni Annie.

“Sabta ko, An,” ni Edelmar pa. “Isaad ko nimo, kini na lang ang kataposan kong pag-abroad. Magpakasal na gyud ta inigpauli nako.”

“Kun di ka gyud mopatuo nako, di na ka makabasol kun inigpauli nimo naminyo nako sa laing lalaki.”

Pagkadungog ni Edelmar sa maong mga pulong, wala kini manamilit nga mikanaog sa ilang pinuy-anan.

Labihang lagota ni Annie. Nakahilak siya. Matinumanon gayod sa gusto si Edelmar. Karon iya nang nasuta nga wala gayod diay kini maghatag og bili sa ilang relasyon. Mas mahinungdanon alang niini ang dolyares nga kitaon didto sa London kay sa ilang gugma.

Milabay ang duha ka semana. Nagtuo si Annie nga nakalarga na si Edelmar ngadto sa London. Wala na siya maghandom pa sa maong lalaki. Kun wala siya hatagi’g bili sa maong lalaki, dili na lang usab siya maghatag og bili niini. Magkalimtanay na lang sila.

Usa niana ka palis, nanilhig si Annie sa luyo sa ilang balay. Iyang gilimpyohan ang maong dapit nga natam-okan sa daghang layang dahon sa kaymito.

Samtang nanilhig nakadungog siya nga may nagsangpit niya didto sa atubangang bahin sa ilang balay. Iya kining gisusi. Ug mao na lang ang iyang kahikugang pagkakita niya sa nahiabot. Si Edelmar! -- Sumpayan pa