Naghilak nga Bituon

“Wala kay labot kun ingon kami niini. Amo kining kinabuhi. Ug salamat nga nakaamgo ka na nga mga burong kami. Busa sukad karon, isilsil sa imong alimpatakan nga dili mo kami ka-level. Dili ka angay nga makigsandurot sa mga ignorante nga sama kanamo.”

Wala pa mahuman ang ilang panagsulti apan migawas na si Ethan sa lawak sa hotel nga giokupahan ni Jackie. Wala gani manamilit kaniya ang ulitawo. Migawas kini human magbilin og mga pulong nga ingon sa nakasamad sa iyang balatian.

Nakahilak si Jackie. Wala siya magdahom nga ingon niini ang sangkoan sa panagsulti nila ni Ethan. Migrabe hinuon ang problema. Misamot ang komplikasyon. Nadugangan ang panagsungi sa mga kabubut-on nila ni Ethan.

Gibasol ni Jackie ang iyang kaugalingon kun nganong gihinganlan niya’g ignorante si Ethan. Nasayod siya nga nakapasamot kadto sa pagsilaob sa kasuko ni Ethan kaniya. Nainsulto niya ang pagkatawo niini.

Apan wala siya makapugong sa iyang kaugalingon kaganina sa pagluwat sa maong pulong. Wala niya kalikayi nga mahimong emotional. Dili niya madawat ang gihimo ni Ethan nga siya’y gibasol sa tanang mga panghitabo tali kanila.

Misamot hinuon ang kasilo sa kabubut-on ni Ethan kaniya. Ingon gani sa gitapos na ni Ethan ang ilang panaghigalaay. Mora’g wala nay bili alang kang Ethan ang ilang bonding kaniadto. -- Sumpayan pa