Dinhi sa lungsod sa San Gabriel si Mr. Heinrich ang labing dato nga magpapatigayon. Duna may daghang magpapatigayon dinhi sa lungsod sa San Gabriel apan dili gyud sila makatupong sa kadato ni Mr. Heinrich.
Ang iyang inahan mao si Magna, ang labandira kaniadto sa mga Alfaranga dunay mga mini-bus ug kay duna may penpal nga Amerkano si Magna maong nadato siya dihang gipangasawa siya sa maong dato nga magpapatigayon. Nakaanak sila’g usa ka ambongang lalaki.
Dihang midako na si Bonrackz dili siya makalikay sa mga pagdayeg ug kaibog sa mga dalaga dinhi sa ilang lungsod. Taason nga pagka-ulitawo si Bonrackz ug mahiligon sa sports nga naglakip sa basketball, car racing, golf, sword fencing, chess playing ug uban pang mga matang sa sports diin walay kapuol si Bonrackz.
Kay usa ka American-German si Mr. Heinrich natural nga molutaw gyud ang iyang pagka-estrikto og batasan. Dihang namatay kini, dakong bahandi ang napanunod sa inahan ug anak.
Apan ning ulahing mga adlaw namatikdan ni Magna nga nagsige na lang og palit si Bonrackz og mga armas de fuego.
Nakapalit na siya’g kalibre .45 nga pistola, armalite, uzi, magnum .44 pistol, ug diha pay bag-o niyang napalit nga Ak-47 assault rifle ug uban pang mga matang sa armas nga mga high power.
“Mora’g daghan na kaayo nang imong gipamalit nga mga armas, Bon,” ni Magna pa ngadto sa anak sa hinay nga tingog. “Unsaon man kana sila nimo, ha, anak?” “Collections lang gud, Ma,” hinay usab nga tubag ni Bonrackz.
“Di ba delikado kun mahibaw-an ka nga duna kay gitagoang mga armas dinhi?” Mora’g dunay diyotay’ng kabalaka sa tingog sa inahan.
“Depensa pud ni nato, Ma,” mitan-aw ang ulitawo sa inahan. “Sayod ka na bitaw nga kuyaw na kaayo ang panahon ron. Duna ra ba tay daghang kuwarta ug kinsay nasayod nga kalitan ta’g saka dinhi’g mga daotang tawo ug tulison ta. Maayo nang mangandam tang daan. Magsige na gani ko’g praktis og pusil, Ma. Sakop na ko ron sa usa ka Shooting team sa siyudad...”
“Bonrackz, anak, duna ko’y itug-an nimo,” ni Magna pa.
“Unsa man na, Ma?”
“Mahitungod ni sa atong kaliwat,” wala motan-aw ang inahan sa anak. Mora’g katug-anon siya o dili na lang.
“Kaliwat? Kay unsa man diay ang atong kaliwat, mama Magna?” Nahatan-aw ang ulitawo sa inahan.
“Mga kaliwat ta’g mga ungo, undo,” miigham si Magna. “Ikaw, inig edad nimo’g 21 anyos mosulod na sa imong dugo ang pagka-ungo!” “Unsa? Kaliwat ta’g ungo? Aw, unsa man goy naa ana, Ma,” ni Bonrackz pa nga mipahiyom ngadto sa iyang mama Magna.
“Makadawat ka sa pagka-ungo, Bon?” kagalkal ang tingog ni Magna.
“Kaliwat man kaha na nilang Papa Heinrich, aw, way problema, Ma,” ni Bonrackz pa nga milakaw biniyaan ang iyang inahan.
Tuod, pagka tangkod gyud nga bayenti uno anyos ni Bonrackz, ug tayming kadtong gabhiona nga misubang ang buwan, kalit lang nahimong iro ang ulitawo ug dayon nahimo siyang usa ka wakwak. Milupad dayon siya ug nagwakwak didto sa itaas.
Tungod niini, nagubot ang lungsod sa San Gabriel kay matag gabii duna na may mamatay kay gibalbal. Si Mayor Sofronio misugo kang Badong, ang hepe sa kapolisan sa lungsod nga atngan ang mangtas nga wakwak. Kanunay’ng andam ang mga polis sa ilang armas nga magpatrolya matag gabii.
Unya, usa ka gabii nakabati si Badong og tingog sa wakwak busa iya ning gisinggitan, matud pa niya, “hoy, wakwak, dako ka na kaayo’g sala dinhi sa San Gabriel, gusto ka tingali’g tagudtaguron tika sa mga bala ning akong armalite!” Ug mipabuto si Badong sa iyang armalite tumong sa wakwak sa itaas. Apan kalit lang silang nanghapa dihang mibawos ang wakwak og pabuto sa iyang armalite. Ratatatattttattt!!!! Milanog ang buto sa armalite ug misunod ang tingog sa wakwak nga ingon sa naglagot. Dinhi gibati og kakuyaw ang mga polis ug nanagan sila kay ilang nasuta nga wala sila’y bawot sa wakwak nga dunay armas.
Matag gabii, magpabuto gyud ang ungo sa iyang armas nga high power samtang maglupad kini sa itaas sa kahanginan. Ug kay wala na man lang motukol ang mga polis ingon sa wala na magpabuto ang wakwak ug wala na sab kini mamalbal. Apan, si Bonrackz giisip sa iyang mga higala sa Shooting Team nga mao ang labing hingigo nilang kauban sa pagpunting. (Kataposan)