Naghilak nga Bituon

Gula 35

“Sabta ko, Day, please,” mapangaliyupoon ang tingog ni Jackie.

“O-okey,” ni Gilda pa. Paningkamotan ko kutob sa akong mahimo nga makombinser ko si Ethan.”

Nakakita gayod og paagi si Gilda nga magkasulti sila si Jackie ug Ethan. Si Ethan mismo ang miadto sa hotel nga iyang nahimutangan. Bag-ohay pa lang nakalakaw ang iyang mga ginikanan sa pag-abot ni Ethan.

Sa pagsulod ni Ethan sa lawak sa hotel nga iyang giokupar, gipalong niya ang telebisyon nga bag-o niyang gibuksan. Mihari ang kahilom sa sulod sa lawak. Gusto ni Jackie nga wala gayo’y makatugaw sa panagsulti nila ni Ethan. Gi-lock usab niya ang pultahan sa lawak.

“Makigsulti ka man kuno nako?” Sukit ni Ethan nga maoy migisi sa kahilom nga mihabol kanila sa makadiyot.

“O-oo,” mikurog og diyotay ang tingog ni Jackie.

“Unsay imong tuyo nako?” May kauga ang tingog sa ulitawo.

“G-gusto lang kong masayod kun unsay hinungdan nga wala ka na man gyud motambong sa akong mga concert nga gipahigayon dinhi sa ato?”

Wala motubag si Ethan sa iyang pangutana. Miduko kini sa iyang atubangan.

“Tubaga ko, Ethan. Pasabta ko sa tanan.”

“Importante ba gyud diay ang akong presensiya sa imong mga pasundayag?” Mahinayon man tingali ang imong concert bisan wala ako?” -- Sumpayan pa