Milingiw si Paeng ug midali-dali pagkuot sa iyang panyo gikan sa tuo niya nga bulsa sa pantalon. Gusto niya tagoon ngadto ni Zeny nga naghilak siya. Apan uwahi na kay nakabantay na diay ang dalaga sa iyang pagbakho kaganina.
“Pasayloa kun nakatugaw ko nimo Sir. Gusto na unta ko nga taposon ang tanan kaganina apan imo man ko nga giluwas pag-ambak nako sa linaw. Dia ko karon aron pasalamatan ka,” hinay nga pasabot ni Zeny.
Nananghid ang kauban ni Zeny nga mobalik sa ilang grupo aron paghatag og higayon kanila ni Zeny ug Paeng nga magkasultihanay. “Paeng diay ang akong ngalan Zen,” nagpaila ang ulitawo.
“Nganong gusto ka man nga magpakamatay ganina Zeny?” gipangutana ni Paeng ang dalaga. Wala dayon kini motubag. Miduko apan taud-taud may kaisog na kini nga mitug-an sa hinungdan.
“Nagkabuwag kami ug ang akong boyfriend. Nagkasabot na unta kami nga magpakasal karong Disyembre apan nangita siya’g lain,” may kasubo na ang tuno sa tingog sa dalaga.
Nangagho si Paeng. “Pareho diay kita og kaagi Zeny. Mao nga dia ako karon sa Kawasan falls kay gihandom nako ang matam-is namo nga kaagi uban sa akong girlfriend nga nakigtaban usab sa laing lalaki.”
“Mao diay nga nagbakho ka kaganina dihang hilom ko nga miduol nimo. Pait kaayo ang atong kahimtang Paeng,” matud ni Zeny nga may kaisog na nga mitutok sa ulitawo. Nagkatinutokay silang duha.
Taud-taud nagunitay na sila sa ilang kamot. Wala damha ni Paeng nga inanay’ng nabihag ang iyang masulob-ong kasing-kasing sa katahum ni Zeny. Daw gimagnet ang iyang panan-aw sa kaanyag sa dalaga. “Dili ko makatoo nga budhian ka sa imong hinigugma Zen kay matahum ka,” ni Paeng pa nga mitutok sa dalaga. Nakapahiyom si Zeny nga nakadungog nga gidayeg siya sa ulitawo.
Gihugtan pagunit ni Paeng ang kamot ni Zeny samtang padayon siya nga mitutok sa dalaga. Inanay niya kini nga giagbayan. Wala molihok si Zeny dihang hinay siya nga gipasandig ni Paeng sa iyang dughan.
“I love you Zeny,” daw nagkuba-kuba ang dughan sa ulitawo nga militok sa maong mga pulong ngadto sa dalaga. Inanay nga migakus si Zeny kang Paeng. Dali ra nga nagkasinabtanay ang mga kasing-kasing sa pulos binudhian sa ilang hinigugma.
Mingiob na pag-ayo sa ilang nahimutangan. Wala nila palandonga nga nag-ukobay na ang masig nila ka mga ngabil. (Sumpayan)