Bawion ko ang imong gugma - Gula 78

May baroganan siya nga pagka-babaye. Dili na siya makahimo pagbakwi sa iyang hukom sa pagpakasal kang Melvin. Maluoy siya sa ulitawo kun iya kining buhaton sa ingon tungod kay nasayod siya nga gihigugma siya niini. Dako usab siya’g utang kabubut-on niini.

Sa kinauyokan sa iyang kasingkasing iyang nasuta nga may pagbati pa gihapon siya alang kang Edelmar. Apan dili makabasol si Edelmar kaniya kun nganong magpakasal siya ngadto kang Melvin. Alang kang Annie, si Edelmar ang mabasol kun nganong ingon niini ang gidangatan sa ilang relasyon.

Kapin sa usa ka semana nga wala magpakita si Melvin sa pinuy-anan nila ni Annie. Nahibulong si Annie kay dili ingon niini si Melvin. Sukad nga gikasabotan na ang ilang kasal, hapit kada adlaw anaa si Melvin sa ilang balay. Mao nga gihandom ni Annie ang pagbisita ni Melvin kaniya.

Usa niana ka hapon, nahitungha si Melvin sa gipuy-an sa dalaga. Nahinangop si Annie. Gibati niya ang kamingaw sa pamanhonon nga kapin na usa ka semana nang wala mopakita kaniya.

“Diin ka man?” Sukit ni Annie. “Taudtaod ka laging wala mopakita nako?”

“Dinhi ra ko sa Sugbo,” maoy tubag. “May mahinungdanon lang kong giasikaso.”

Namatikdan ni Annie ang talagsaong kaligdong sa nawong ni Melvin. Seryoso kaayo kini’g hitsura.

“M-may problema ba?” Nanagat pagpangutana si Annie.

“Wa koy problema, An,” matud ni Melvin. “Kamo si Edelmar ang may problema.”

Nakalitan si Annie sa gisulti ni Melvin. Nahitutok siya sa ulitawo. -- Sumpayan pa