Bawion ko ang imong gugma

  “Dili ka makabasol kun nganong nabuhat ko kini. Wa ka na mobawos sa akong mga suwat kanimo samtang didto ka sa London. Di na sab nako makontak ang imong cellphone. Wa na ko makabalita bahin nimo. Mora ka’g bairan nga nahulog taliwala sa dakong lawod nga wa na gyud igdungog. Karon unsa may gusto mo nga mahitabo? Palaomon ko nimo sa way kaseguroan?”

“Wa ka lang makasabot nako, An.”

“Ug unsa may wa nako hisabti?” Di ba klaro man kaayo nga nahikalimot ka na kanako? Ang wa nimo pagbawos sa akong mga suwat nagpasabot nga wa nay bili alang kanimo ang atong relasyon.”

“Nasayop ka, An. Tinuod...angkunon ko nga nasayop ako tungod kay wa na nako tubaga ang mga suwat nga imong gipadala kanako. Apan gihimo ko kadto tungod kay di ko gustong magsige’g hunahuna nimo. Sa matag higayon nga magbasa ko sa imong suwat, bation ko ang tumang kamingaw ug gusto na lang kong mopauli dinhi sa Pilipinas bisan wa pa mahuman ang akong kontrata. Mao nga nakahukom kong di na mobawos sa imong mga suwat aron di mosamot ang akong kamingaw nimo. Apan wa ko magdahom nga ingon ba diay niini ang sangpotan sa akong gibuhat.”

“Binuang kanang katarongana!”

“Mao kanay tinuod, An. Kun ikaw pa sa akong dapit, imong masuta nga di diay lalim nga mahilayo sa imong mahal sa kinabuhi. Maong nakahukom kong di na mobawos sa imong suwat aron maka-concentrate sa akong trabaho.”

“Kun ikaw pa usab sa akong dapit, makaingon ka sab nga di diay lalim kun magpaabot ug maglaom sa way kaseguroan.” -- Sumpayan pa