Bugtong krus nga pas-anon

Alas singko sa buntag maoy kasagarang oras imata ni Donato. Nia na siya sulod sa kasilyas. Sa naandan, modiskarga siya’s iyang hugaw, manipilyo. Unya maligo apan karon wa na siya’y plano nga mobuhat sa naandan.

Kay gusto na siyang mamatay. Naglingkod na siya’s ibabaw sa inidoro. Nagtion og paltik nga rebolber sa tuong habig sa iyang ulo. Hinatag ning pusila sa iyang ig-agaw nga pulis para proteksiyon kuno. Apan wa damha nga maunay ra siya niini.

Wa na siya kaagwanta sa kaselosa sa iyang asawa nga si Elena. Trayenta ka tuig na silang minyo. Nangapo na sila. Impotent na si Donato tungod sa dayabitis. Unya moingon lang si Elena.

“Impotent ka lang sa asawa! Apan sa laing babaye dili!”

Haskang lagota ni Donato maong kahikogon gyud siya.

Tiaw mong bisa’g giunsa niya’g panumpa ug pasalig sa iyang asawa nga sukad pagkaminyo nila di na siya motan-aw og laing babaye. Wa gyud nituo. Selosa lang gihapon.

Nasakpan man gud si Donato ni Elena nga may laing uyab kaniadtong panahona sa uyab pa sab sila. Maong sukad sa hitabo nagpakasal dayon sila pagpamatuod ni Donato ngadtong Elena nga si Elena ra gyud iyang gihigugma.

Apan sulod sa 30 ka tuig sa ilang kaminyoon wa gihapoy pagsalig si Elena sa iyang kapikas. Maong sakit kaayo sa buot ni Donato ug nakahukom siyang honoson na lang iyang kinabuhi.

Ang pagkamahigalaon ni Donato ang nakaingon. Barangay kapitan siya sa baryo Neoprene. Usa siya ka lisensiyado nga Civil Engineer. May construction firm. Daghan siyang gipangtukod nga mga building sa nagkalainlaing siyudad sa Sugbo. Mao ni iyang panginabuhi. Mahulog sa sideline na lang niya ang pagka-barangay kapitan.

Sa niaging gabii naglalis sila’g maayo ni Elena kay niandar na sab ang pagkaselosa sa asawa. Sa sayong hapon nianang adlawa may babaye nga maanyag ug seksi nga nibisita sa barangay hall. Nagpaminaw si Elena sa panaghinabi kay siya ra may sekretarya sa kapitan.

Nangayo’g barangay clearance ang bisita nga nagpaila nga si Mrs. Perlita Lehnert. Duna siya’y tukorong negosyo sa maong barangay. Australiano ang kapikas ni Mrs. Lehnert. Mapahiyomon ug mahigalaon kaayo ang bisita. Nangayo og tarheta sa kapitan.

“Unsa man diay angga nimo?” sa kapitan nga nidawat pud sa tarheta gikan sa bisita.

“Perly” sa bisita, “Just call me, Donnie” sa kapitan.

Tungod lang ining matanga sa pakighinabi sa kapitan ngadto sa bisita gihukman dayon ni Elena nga ni-flirt si Donato sa bisita. Bisa’g giunsa ni Donato pagpasabot nga “I was just being friendly” di gyud motuo ang kapikas. Kinsa bay banang malipay nga sa iyang pagbinut-an sulod sa 30 ka tuig himabaye lang gihapon siya sa mata sa iyang asawa.

“Bisa’g impotent na!” Wa na siya’y kalipay ining kinabuhia.

Nagtibi si Donato nga hilom nga nanamilit sa kalibutan.

Nituyhad si Donato ug niyahat sa dayon na niyang kablit sa gatilyo sa pusil. Unya sa katapusang higayon gibasa niya ang poster sa “Manifesto of Happiness” nga iya mismong mugna nga gipapilit sa pultahan sa kasilyas. Nag-ingon ang manifesto: “I am a happy person I want to be happy every second of the day. I don’t bear grudge or hatred because that would obstruct my happiness. I don’t exact revenge because God said ‘vengeance is mine!” And getting even would not put me ahead.

“I totally ignore unhappy, angry, stupid, envious or mentally ill people who want to contaminate me with their unpleasantness. I won’t allow anything, person, event or situation ruin my day. Life is too short to dwell on trivial and unimportant matters.” – Donato Agipo.

Pagkahuman niya’g basa nakaamgo si Donato nga nindot pa diay puy-an ang kalibutan bisa’g may mga gumonhap. Gipaubos niya ang pusil giluklok niya sa iyang hawak. Ug nakahukom siya nga ang kaselosa sa iyang asawa mao na lay iyang bugtong krus nga pas-anon. Kay sa panultion pa “Everyone has his or her own sorrow!” Nalikay siya sa kadaut sa iya mismong motto. Ug gisugdan na lang niya iyang naandang gimbuhaton sulod sa kasilyas. (Kataposan)