Gula 29
“Don’t worry, my friend. Sa gikaingon ko na, paukyab lang kini.”
Miabot ang gikahinamang gabii sa pasundayag ni Jackie nga nag-ulohan og “I Luv Cebu”. Nagsugwak ang mga tawo sa Cebu Coliseum.
Pag-abot sa gitakdang oras, gisugdan ang pasundayag ni Jackie. Mihugyaw ang crowd pagkakita kaniya nga migawas na gikan sa backstage. Gidalitan gilayon niya ang mga Sugbuanon og usa ka introductory song.
Human sa una niyang kanta, gisal-ot ni Jackie ang pagpasupot sa iyang pasalamat ngadto sa mga nagpaluyo sa iyang konsiyerto. Gipasalamatan niya ang iyang mga sponsors.
Gawas sa iyang mga sponsors, gihatagan usab niya’g kredito ang pipila ka indibidwal nga nakatabang aron matigayon ang iyang first solo concert sama sa iyang manager, choreographer, direktor, guest singers ug uban pa.
Lakip sa gihatagan niya’g kredito mao ang mga opisyal sa lokal nga kagamhanan sa dakbayan sa Sugbo ug ang tagdumala sa Cebu Coliseum.
Bisan trivial kaayong pamation, naapil usab sa gihatagan niya’g acknowledgement sila si Gilda ug Ethan nga nakita niyang naglingkod sa lingkoranan sa mga special patrons, nga giangkon niyang suod niyang mga higala. Iyang kabubut-on nga sa atubangang bahin gayod molingkod sila si Gilda ug Ethan. -- Sumpayan pa