Naghilak nga Bituon - Gula 26

Sa set, very professional sila si Jackie ug Jerome. Dili gayod mailhan nga pulos lang paukyab ang ilang relasyon. Wala gayod sila’y kalainan sa matuod nga mga managhigugmaay. Pareho silang nag-amping nga dili makamugna’g lihok o ba kaha makaluwat og mga pulong nga makapaturok og katahap sa taga entertainment media nga kanunay nagbantay sa ilang mga lihok.

“Can I invite you for a dinner?” Hangyo ni Jerome human sa ilang taping.

“Sorry,” mibalibad si Jackie. “Pagod na ako. Kailangan ko nang magpahinga at may rehearsal pa ako bukas para sa nalalapit kong concert.”

Wala motubay si Jerome sa iyang gisulti. Nakita ni Jackie nga milamugdong ang nawong sa iyang ka-loveteam.

“I hope you could understand,” ni Jackie pa. “Your invitation is very untimely. Baka next time pwede na ako.”

“Okey,” ni Jerome pa nga wala na lang mamugos.

Gabii nang nahiuli si Jackie sa townhouse nga iyang gipuy-an sa Laguna. Kining maong balay nga iyang gipuy-an apil sa premyo nga iyang nadawat isip grand champion sa artista search nga gipasiugdahan sa UBS-CVN.

Gawas sa balay ug ganting salapi nga iyang nadawat nga mikabat sa P2 million, may Expedition pa gayod siya nga apil sa iyang premyo.

Maoy kauban niya sa pagpuyo sa maong balay si Nang Tinay nga maoy nag-atiman kaniya ug naghikay sa tanan niyang kinahanglanon sa balay ug si Noy Teryo nga iyang drayber nga adto magkatulganan sa garahe. -- Sumpayan pa