Gisiko ko’g hinay ang kilid ni Jenny. Nakalitan ang ako ig-agaw. "Naunsa ka diha?" Gingisloan ko ni Jenny kay nabalda ang iyang pagtan-aw sa nagginukdanay nga managhigugmaay sa puting balas sa North Sky, usa ka beach resort sa Sogod.
Nangaligo man god kami niadtong tungora. Mibakasyon kog kadiyot sa ilang Jenny. Nagpuyo ko sa siyudad uban sa akong mga ginikanan.
Igsoon ni Mama Elena ang amahan ni Jenny. Nagsaka si Jenny sa among balay sa Mango Avenue kun panahon sa tingklase. Ug kay bakasyon man ug wa pa magsugod ang klase, maong nia ko sa Sogod, sa balay nila ni Jenny.
"Kana ba siya, kinsa man na?" Gitudlo ko sa akong simod ang usa ka lalaki nga nag-inusarang naglingkod sa usa ka cottage.
"Nakagusto ka?"
"Well, guwapo siya. Macho ug dili lisod mahalon." Mikatawa ko. Gipahiyoman ko ni Jenny.
"Duna na nay tag-iya, uy!"
“Sagdi lang gud bisag duna nay nakatag-iya niya.”
Migawas ang lalaki sa cottage. Mibiya sa beach. Nangalot ko sa akong ulo. Nakapanglingo ko.
"Tua na nuon siya, Jenny. Sayang nga wa ko siya ikaila."
"Gusto gyod nimo siyang ikaila, Rose?"
"O lagi."
"Sige, ugma ipaila-ila ko kamo sa usa’g usa."
Nalipay ko. Giguwapohan gyod ko sa maong lalaki.
Pagka ugma, sayo ming nanimba si Jenny. Unang misa sa buntag ang gusto namong tambongan. Nahibulong ko kay inay manulod mi sa simbahan nga duol ra sa balay nilang Jenny, gidala nuon ko niya sa kombento.
"Nganong nia man ta dinhi, Jen?"
"Wa pa magsugod ang misa. Anhi una ta dinhi. Di ba gusto mo man ikaila kadtong lalaki nga nakita mo gahapon sa beach?"
"O-Oo. Pero..." wa na ko makatiwas og sulti kay usa ka pari nga nagsotana ang migawas sa usa sa mga kuwarto sa kombento. Nahingangha ko.
Miduol ang pari namo.
"Good morning, Dre."
Bisag bugnaw ang kabuntagon pero gipaningot ko. Naulaw ko sa akong kaugalingon. Si Jenny ra ang nakapangayo’g katahoran sa pari. Di mabuka ang akong baba.
"Uy, Jenny, kamo man diay. Maayong buntag sab. Kinsa man ning imong kauban? Karon pa ko makakita niya."
"Akong ig-agaw, Dre. Si Rose. Taga siyudad ug nagbakasyon dinhi sa ato."
Milingi si Jenny nako. Nakasabot ko sa iyang tinan-awan. Tinuod gyod diay nga duna nay tag-iya ang lalaki nga akong gikaibgan.
Nangayo ko’g katahoran sa pari. Unya gikuptan ko ang kamot ni Jenny. Gibitad ko siya paingon sa gawas sa kombento. Wala na koy interes nga masayran ang ngalan sa lalaki nga sa unang higayon pa lang nakong pagkakita niya gahapon sa beach nahigugma dayon ko niya.
Pastilan ning gugma! Hilom kong nakaingon.Nakapanglingolingo ko. (Kataposan)