Midungo si Annie dihang siya’y gitutokan sa iyang amahan. Mipasigpat siya kang Melvin. Nagpasigpat diay usab si Melvin kaniya.
“Maayo hinuon nga magminyo na kamo, Dong,” matud ni Nang Karing. “Gusto na sab ming makakita sa among apo. Apan makadawat ka kaha sa among kahimtang? Sa kakabos sa mamahimo mo unyang asawa?
“Di kana problema, Nang,” ni Melvin pa. “Sa dihang gipangulitawhan nako si Annie, gidawat na nako ang iyang pagka-siya.”
“Basin ba unya’g magmahay ka sa kapulihay kun mahinayak ka,” ni Nang Karing pa.
“Dili kana mahitabo, Nang,” nagkanayon si Melvin. “Tungod kay gihigugma ko sa tibuok kong kinabuhi si Annie.”
Mora’g mibukad ang kasingkasing ni Annie pagkadungog sa ulahing gisulti ni Melvin. Flattered kaayo siya sa mga pulong niini.
“Kun mao,” ni Noy Juan pa, “dad-a dinhi ang imong mga ginikanan aron among saboton ang inyong kasal.”
Mitando si Melvin.
Paglabay sa tulo ka adlaw, nahiabot ang mga ginikanan ni Melvin sa Sugbo. Nakig-atubang dayon sila sa mga ginikanan ni Annie. Mibati og kaulaw si Annie dihang gipaila na siya ni Melvin ngadto sa mga ginikanan niini. Pulos desente’g pamaro’g ang mga ginikanan sa lalaki nga dakong negosyante didto sa Masbate.
Ang mga ginikanan ni Annie mibati sab og kataha sa pagpadayon sa mga ginikanan ni Melvin sa kabos nilang pinuy-anan. Apan ilang namatikdan nga gaan kaayo’g kabubut-on kanila ang mga ginikanan sa lalaki. Ilabi na gayod ngadto kang Annie. Ingon sa napasabot nang daan ni Melvin ang mga ginikanan niini mahitungod sa ilang kahimtang. -- Sumpayan pa