Wa ko magkinahanglan Bador nga adlaw-adlaw na lang imo akong pahigopon nianang init nga sabaw sa tinuwa, gikan sa isdang timbongan!, ni Iska pa nga gisalibay og labay ang usa ka panaksang sabaw sa tinuwang isdang timbongan.
"Unsa may nahitabo kanimo Iska, nga mao ra ka man og gisapot?" nangarisgar pagpangutana ang bana.
"Subra pa sa giingon nimo Bador nga gisapot?" daling tubag ni Iska nga siga pa sa iring banbanon ang duha ka mata.
Gikutaw gayod ang hunahuna ni Bador, karong udtoha. Imbis unta nga kusog ang tukob sa isdang timbongan ug sayo gani siya nga midunggo,aron timprano siya makatuwa ug makahigop ang iyang asawa og init nga sabaw ... miresulta na man hinuon kini og kasapot.
Dili ikalimod nga wa pay usa ka buwan nga nanagtipon si Bador ug Iska, isip magtiayon, ning ilang balangay sa Libo diin gumikan sa kakusog sa tukob sa mga isdang til-ogon, sayo kaayo nga mobangon si Bador aron mamasol.
"Maayo pa man lang og wa akoy bana Bador? Imbis naa, kanunay man hinuon ako uhawon ilabi na sa higayon nga mangalisngaw ang kailiw sa akong kahidlaw!'' luhaan ang duha ka mata ni Iska.
"Sabta intawon ako Iska nga anugon kaayo ang kakusog sa tukob sa mga isdang til-ugon, nga makuha sa akong pasol!'' ni Bador pa nga mipasabot sa iyang asawa.
Kaadlawon kadto sa adlaw'ng Sabado. Kusog kaayo ang ulan. Maoy naalinggatan ni Bador nga gitakigan og maayo si Iska. Nangurog ang tibuok kalawasan.
"Moadto na usab ikaw Bador, bisan ako gihilantan?" nagpangurog ang tingog ni Iska.
"Basin... og kusog na usab ang tukob sa isdang timbongan," daling tubag ni Bador.
"Mangalisngaw na usab ang kainit sa sabaw sa tinuwa nga imong higopon!"
Ambot unsang pagkaunsaa ...nga kalit man lang gigakos og hugot ni Iska ang hawak ni Bador?
Wa na makalihok pa si Bador, kay sa kahugot sa gakos sa iyang asawa, mao na man lang ang iyang nayanghagan nga wa nay sapot ang iyang asawa ... diin nagkayuring og hagawhaw nga nagkanayon:
"Uhawon gihapon ako Bador ... bisan adlaw-adlaw imo akong gipahigop og tinula!
Ug unya mibanos ang nagbuy-od nga kahilom.(Kataposan)