Maayo na lang gani kay nahiabot si Melvin sa iyang kinabuhi. Si Melvin ang nahimong tapak sa kahaw-ang nga gimugna ni Edelmar sa iyang kinabuhi. Si Melvin ang tapak nga sa kadugayan, nahimong bililhong bahandi sa kinabuhi ni Annie. Gimahal ug gihigugma na niya pag-ayo si Melvin.
Wala na mangandoy si Annie nga magkakita pa pag-usab sila si Edelmar. Alang kaniya, si Melvin na maoy kabahin sa iyang kinabuhi.
“Magminyo na ta, An,” miagni si Melvin dihang kapin na sa usa ka tuig ang ilang relasyon.
“Ready ka na diay?” Sukit ni Annie.
“Oo,” maoy tubag. “Dugay ra kong ready, uy. Ikaw lang maoy akong giagad-agad.”
Nahilom si Annie. Iyang gihunahuna ang gisulti ni Melvin. Natimbang-timbang niya nga anaa na siya sa hustong edad. Daghan na man gani sa iyang katalirongan ang nagminyo na ug duna nay mga anak.”
“Mosugot ka ba, An,” misukna si Melvin sa pipila ka daklit,” sa akong proposal?”
“Sige,” daling hukom ni Annie. “Pananghid nilang Tatay.”
Miatubang gilayon si Melvin sa mga ginikanan ni Annie aron pagpangayo sa mga kamot sa dalaga. Diha usab si Annie atol sa pagpakigsulti ni Melvin sa iyang mga ginikanan.
“Wa kami pagsupak kun mao kanay inyong gikasabotan,” nagkanayon si Noy Juan. “Anaa na kamo sa hustong edad. Total, nagkahigugmaay man kaha gyud mo?” -- Sumpayan pa