Makadani ang awit ni Brigida mangtas

Kutob sa makadungog sa awit ni Brigida mohunong dayon ug tiwason ang pagpamati sa awit sa dalaga hangtod nga mahuman kini. Ug way ulitawo dinhi sa balangay Suwab-Punyal nga wala mangandoy nga makita gyod sa personal kini si Brigida.

Anak si Brigida sa adunahang Diosdado ug Maricar ug higpit kaayo ang pagbantay sa magtiayon sa ilang anak dalaga.

Kun moeskuyla kini duna gyoy mo-escort niini nga bodyguard nga mohatod-kuha niini sa Unibersidad. Karon nga hingkod nang dalaga si Brigida misamot ka higpit ang iyang amahan ug inahan.

Dili gani makadalikyat ang dalaga bisan sa baybayon lang dinhi sa Suwab-Punyal. Dihay kausa nga miipsot ang dalaga aron moadto sa baybayon ug wala pa gani dangtig tunga sa oras diha na ang bodyguard niini nga si Eksmador.

Isog kaayo’g nawong si Eksmador ug dili magpanuko pagpakgang ni bisan kinsa nga mangahas pagduolduol sa dalaga. Karon ingon sa hapit na makalimot ang taga dinhi sa balangay sa hitsura ni Brigida, kun unsa na kini, kun guwapa ba gihapon kini o unsa ba.

"Kanindot unta kun sa ikaduhang higayon magkahimamatay kami ni Brigida," nagkanayon si Jaime nga anak ni Toribio-Binang nga maoy tag-iya sa minibus nga magbiyahian sa balangay paingon sa siyudad. Dili matawag nga dato kining pamilyaha apan duna lay kuwarta nga sarang ikatukod nila sa ginagmay nilang mga negosyo kay nakatrabaho man si Toribio didto sa Saudi Arabia sa dugaydugay na nga panahon ug karon nga wala na siya ganahi mobalik sa Saudi maong namalit siyag mga butang sama sa sakyanan de pasaheroan ug nagtukod silag gamay'ng tindahan.

"Di ba naibog man nimo kana si Brigida, Jaime,"hinay ang tingog ni Catalina nga manindahay og kamoteng kahoy nga poto.

"Mao unta, pero unsaon man nga dili naman ta kaduol niya," ni Jaime pa nga subo ang nawong. "Sige na lang, total, matag hapon moanha man ko sa ilang gate ug mamati sa iyang awit. Pagka nindot sa awit ni Brigida..."

"Duna ra bay estorya ang amahan ni Brigida, Jaime,"ni Catalina pa nga naghapnig sa linuto niyang bag-ong haon nga poto.

"Unsa may istorya diay, Nang Talina?" ni Jaime pa.

"Kana si Diosdado nga amahan ni Brigida anak ni Racuda nga hilabihang ka mangtas. Dato hinuon kaayo, ug maong dato usab kaayo kana si Diosdado. Ambot unsay hinungdan nga hapit nalang niya dili pa-istoryahon og tawo ang ilang anak, nga bugtong man unta kini..." Mitan-aw si Catalina sa matahom nga mansion nila ni Diosdado nga nagbuntaog sa may nabungtod nga bahin sa balangay.

Usa ka hapon daghang nakadungog sa awit ni Brigida. Usa ka mamingaw'ng awit nga ininglis ang giawit niini ug ang tingog niini ingon sa misakay sa hangin ug nabati kini sa tibuok balangay.

Pagka ingon ugma samtang naglakaw si Jaime subay sa dalan nga mohatod kaniya ngadto sa gate sa mansion nila ni Brigida, kalit lang may mitugpa nga morag langgam, dayon mahimo kining tawo. Sa dakong kahikurat ni Jaime maoy misugat sa iyang panan-aw si Brigida nga mapahiyomon kaayong nagbarog sa agianan.

"Jaime, kadugay na nga wala na kita magkita. Gimingaw ko nimo," sa dalaga pa nga miduol og hinay sa ulitawo. "Gusto ko nga maparehas ka na nako... di ba mahal mo man ako, ug gimingaw ka usab nako?"

Miyango si Jaime nga ingon sa naamang sa iyang nasaksihan.

Gipaak dayon ni Brigida ang liog ni Jaime. Miaguhob si Jaime pagdapat sa mga tango ni Brigida sa liog sa ulitawo. "Hugggghhhh...."

Pagka ingon ugma sa kagabii, may nabati ang taga dinhi sa balangay nga nagduweto sa pag-awit -- tingog sa babaye ug lalaki. Ug may nakasinati sa maong mga tingog, si Brigida. Matud pa ni Catalina nga kadtong duha katingog nga nagduhawit, sila kadto si Brigida ug Jaime. Natakdan gyod diay si Jaime pagka ungo. (Katapusan)