Malipayon si Annie sa relasyon nila ni Melvin. Sa kadugayan, daghan pa siya’g nadiskubrehan nga mga maayong hiyas sa ulitawo nga iyang nagustohan. Nawala na sa hingpit kadtong impresyon niya sa ulitawo sa una nilang panagkita nga hambogero kini. Dili diay tinuod ang giingon nga first impression lasts, niya pa. Kay iya mang nasuta nga sayop ang una niyang impresyon nga hambogero si Melvin. Buotan ug mapainubsanon diay ang ulitawo. Ang tinuod, wala gayod mahigugma si Annie kang Melvin sa pagsugod sa ilang relasyon. Gidawat lang niya ang gugma sa ulitawo tungod kay giabot na siya’g kaluoy niini. Apan nunot sa pagpanglabay sa mga adlaw, gumikan usab sa gipakitang dalaygong kinaiya ni Melvin, inanay siyang nakakat-on sa paghigugma niini. Hangtod nga hingpit na siyang in love kang Melvin.
Hingpit nang nahikalimtan ni Annie si Edelmar. Ang iyang kalibotan didto na mituyok kang Melvin. Dili na gani siya buot nga mahisgotan ang ngalan ni Edelmar. May mga higayon nga malakbitan ni Melvin sa ilang panagsulti ang ngalan ni Edelmar. Barawon dayon niya ang hinigugma tungod kay dili na siya gustong makadungog sa ngalan sa kanhi niyang hinigugma. Dili na gugma ang iyang gibati karon ngadto kang Edelmar kondili, kasilag ug kahiubos.
Kinsay dili masilag ug mahiubos sa gibuhat ni Edelmar kaniya? Gipalaom siya ni Edelmar nga ang pag-abroad niini alang sa ilang kaugmaon. Nga inigbalik niini sa Pilipinas magpakasal na sila. Apan dihang didto na kini sa London, nahikalimot na kini kaniya. Wala na kini mobalos sa iyang mga sulat. Gikaguol niya pag-ayo ang gibuhat ni Edelmar kaniya. -- Sumpayan pa