Ang kabo ni Estong

Ang panahon dili gayud mahibaw-an. Si Estong nga nag-inusarang anak nila ni Mente ug Ebyang nga taga Singson, Village, Guadalupe, maoy buhing ehemplo sa panag-ingnan nga ang kinabuhi sama sa untol sa bola, karon anaa ka sa itaas ug unya ganuyon ka paubos.

Tuig 1977, natawo si Estong nga nagtangag og kutsarang bulawan. Sa sayong banagbanag sa iyang kinabuhi, anaa na kaniya ang tanan. Pagkaon, harianong panimalay, salapi, kotse ug uban pa.

Sa sobrang pangga sa iyang ginikanan, si Estong wala manumbaling nga makat-on sa buluhaton sa panimalay sama sa pagpanghugas sa iyang kinan-an, pagpanglaba sa iyang bulingon, ug lung-ag ug uban pa nga kuri-kurion.

Tulin nga niligid ang panahon, si Estong nahuman na sa pagtungha sa kolehiyo ug nakuha ang kursong Mass Communication apan wala gihapon makat-on sa pagbarog sa kaugalingong tuhod. Kanunay lang gihapon kining magpangayo sa iyang ginikanan ug walay tihik-tihik nga mowaldas sa salapi nga dili niya hinaguan. Tapolan ug hakog si Estong.

Usa ka gabii niana, gitukaw ang iyang hinanok sa balita nga naaksidente sila si Mente ug Ebyang ug nitaliwan na kini sa dayon. Tungod sa kalit nga hitabo, si Estong nabag-ohan. Siya na ang nagdala sa negosyo sa iyang ginikanan. Nahimutang sa iyang mga kamot ang pagdumala sa lapad nilang kalubihan sa dakbayan sa Bogo, Cebu ug kan-anan sa may tumoy nga bahin sa dalan Andres Abellana Ext.

"Hehe, mao ni akong gusto. Wala nay makabuot nako. Sige, bay Ronnie, bay Bebe, hutdon ta ning mainom. "Mangita ta og kalingawan gikan dinhi sa imnanan.." sagol hinubog nga pamulong ni Estong atubangan sa iyang mga higala nga sila si Ronnie ug Bebe, nga anak usab og adunahang pamilya. Tungod sa kahakog, sa panahon nga duolon sa mga kaparyentehan nga magpakitabang kaniya, si Estong dili gayud mahangyo. Bisan diyot dili makahatag.

"Estong hunonga na imong pagkabisyoso, nalukop ka nalang og kuyog sa imong mga barkada. Wala ka na gani makaalinggat nako diri," masulub-ong pulong ni Kurdapya ngadto ni Estong.

"Ay, sus kanimo Kurdapya. Hala pangita diha og imong kalipay aron dili ka magproblema nako. Wala man bitaw tay anak," pintok nga pamulong ni Estong dayong biya sa iyang asawa. Samtang si Kurdapya ningaab. Nagdibal ang gibating kahiubos ngadto ni Estong. Apan wala madugay, nitakilid ang negosyo nga gidumala ni Estong tungod sa iyang pagkatapolan, pagkahakog ug pagkawalay kabangkaagan. Giprenda ni Estong ang yuta nga namungingi sa daghang lubi ug wala na malukat pa. Samtang, ang kan-anan nga hugupanan sa mangaon ug lugaw matag hapon, nadala usab kini sa ratsada.

"Kapait diay niining mag-inusara sa kinabuhi. Gibiyaan nako sa akong asawa nga si Kurdapya, gihuboan pa gyud ko sa tanan nga kabtangan sa akong mga gipang-utangan. Giyam-iran sa mga tawo," hagawhaw ni Estong sa kaugalingon nga puno sa pagmahay. Nahisama na siya sa irong walay tag-iya. Nikag-at. Nagkawil-kawil ang dakong kamisin nga hinatag sa Intsik nga tag-iya og tindahan sa ukay-ukay sa Magallanes.

Si Estong, nahimong tipik ug kabahin sa mga tawo nga naghuwat og sinsiyo nga ihulog sa iyang gibitbit nga kabo sa kilid sa simbahan sa Santo Rosario. Kanunay'ng mauwanan, mainitan. Walay pinuy-anan. (Katapusan)