Bidang problemaha gyud nimo, Roger! Patay nas papa Dencio sa konsomisyon nimo. Si mama Nena mao gihapon, giatake's kasingkasing tungod sa imong kamaldito. Karon, nga kita na lang duha nahibilin, kay maguwang ko nimo, ako na say naproblema ug posible atakehon nas kasingkasing" ni Ben nga gipaningot ug gikutasan nga nakighinabi sa iyang manghod sulod sa balay sa ilang ginikanan kanhi ug mao nay gipuy-an ni Roger. Naggakos si Roger karong sayong kahaponon sa iyang asawa nga si Marita nga nagkugos sa ilang panganay nga usa pa ka tuig, nga si Dustin. Ang walang kamot ni Roger nga naggakos sa kapikas may fragmentation grenade nga gigunitan.Ang toong kamot may jungle knife nga gition sa liog sa kapikas. Gi-hostage ni Roger iyang kaugalingong pamilya kay nakapatay siya ug dakponon na. Gustong ilogon sa bata ang granada. Kay abig duwaan. Gikawhatkawhat ni Dustin ang granada. "Ayaw, Dust. Mobuto na" ni Marita nga nagkurog ang tingog. Si Ben polis ug maoy gisugo sa hepe nila nga kombinsihon si Roger nga mo-surrender.
"Mao na gyud ni akong kinabuhi, Manoy. Ang tawo makapatay gumikan sa tawo. Bisa’g ingon ani akong kahimtang, di sab ko mosugot nga yatakan nalang sab ko’g maayo. Bisan iro nga kagiron mamahit man gani’g mayatakan, ako pa nga gipakauwawan atubangan sa daghang tawo!" ni Roger nga nagtibi. "Gihangyo tika nga pagbuhat nag matarong bisag karon lang higayona. Sukad sa gagmay pa ta, wa gyud ko kamatngon nimo nga may gibuhat nga dalaygon. Karon, kun mo-surrender ka, moyukbo ko nimo kay kini usa ka dalaygong buhat. Ayaw iangin sa kadaut imong pamilya. Wa silay labot sa imong salaod! Dili sila kaaway nimo" ni Ben nga nangaliyupo ang tuno. Nagpanglingi siya sa gawas sa bintana diin makita niya iyang mga kaubang polis nga nagpalibot sa ilang balay. Ug daghang mga tawong nagnobeler. Nanglab-ok sa laway si Roger. Nilugak diyutay iyang gigunitan sa kapikas. "Unsa may ikatabang nimo nako kun mo-surrender ko?" ni Roger. Nahatotok pag-ayo si Ben sa iyang manghod.
Usa ka bulan nang nagtago-tago si Roger. Unya nataymingan karong adlawa nga niuli, niduaw sa pamilya. Natektekan dayon sa mga polis sa ilang lungsod sa Dismantes kay may mga informer sila sa palibot. Nakadunggab si Roger og konduktor sa dyip depasaheroan. Kay kulang lag singkwenta sentabos iyang plete, unya gibalikas siya pag-ayo sa konduktor.Pagnaug niya, gibilinan dayon niyag buslot sa ilok, tiyan ug bukobuko ang konduktor. Nisibat dayon si Roger.
Kay si Roger paboritong anak sa ginikanan, nilasang ang batasan. Tinumanan siya sa gusto. Barkadista. Katulo magtungha og kurso. Way gihuman. Kay ang pag-eskuyla niya, pangporma lang sa tsiks. Si Marita classmate niya sa klase ug sa pot session. Nagkadayon sila. Aron dunay income, gikwarto-kwarto ni Roger ang ikaduhang andana sa balay sa ilang ginikanan. Duna siyay mga bed spacers nga nag-abang. Si Ben nga ulitawo pa, naglain og puyo.
"Dako kog ikatabang nimo, brod. Ang imong kasong murder mahangyo nako ang piskal nga ipahimong homicide. Sa bilanggoan kun moabot ka nag upat ka tuig puwede na ma-parole. Hangyoon nako ang hepe ug piskal nga di ka kasohan og pang-hostage ug illegal possession of explosive. Gawas pa ana, tabangan nako imong pamilya samtang tua kas bilanggoan. Busa, samtang may pagtugot pa ang hepe nako sa pakigsabot nimo, pahimusli ang higayon" ni Ben. Natumog sa singot iyang unipormeng asul. Dugay'ng naghinoktok si Roger. Nihangad. Niduko. Nagpanglingi sa gawas sa bintana. Nisud-ong sa iyang asawa’g anak. Ug niginhawa’g lawom. "Sige, Manoy. Surrender ko" ni Roger nga nitunol sa granada ug kutsilyo ngadto's maguwang. "Salamat, Ger. Ipasalig nako nimo, di tika pakyason!" ni Ben. Gidawat ang mga armas ug nigakos sa manghod. Gihagkan ni Roger iyang anak. Ug nigakos sa kapikas aron manamilit.
"Mao ning kutsilyoha imong gigamit sa pagdunggab?" ni Ben samtang nagpusas sa manghod. "O, Manoy. Hait pa nas labaha kutsilyoha, Manoy. Humok pa lagis bani ang lawas sa konduktor" ni Roger nga mapasegarbohon. Nag-agbay si Ben sa manghod samtang nanaog sa ilang panimalay. (Kataposan) (Sa gusto’g libreng kunsulta, dad-a ning pahina sa opisina sa tagsulat. Sa Sabado sa buntag)